Офіс Ціханоўскай гатовы супрацоўнічаць з ЕГУ і партнёрамі для захавання дзейнасці ўніверсітэта
15 красавіка, Позірк. Офіс Святланы Ціханоўскай гатовы супрацоўнічаць з Еўрапейскім гуманітарным універсітэтам у Вільнюсе (ЕГУ) і міжнароднымі партнёрамі для захавання дзейнасці гэтай навучальнай установы, паведамляецца ў тэлеграм-канале беларускага дэмакратычнага лідара.
Рашэнне прызнаць ЕГУ “экстрэмістскай арганізацыяй” з’яўляецца “сур’ёзным ударам па акадэмічнай супольнасці і свабодзе адукацыі”, адзначыў дырэктар вільнюскага офіса палітыка і яе дарадца па дыпламатычных пытаннях Дзяніс Кучынскі на сустрэчы з рэктарам ЕГУ Вілюсам Шадаўскасам.
“Гэта, безумоўна, атака на акадэмічную супольнасць, на акадэмічную свабоду. Напэўна, наймацнейшы ўдар па ЕГУ з 2004 года, з часоў, калі ўніверсітэт быў вымушаны працягнуць сваю дзейнасць у выгнанні ў Вільні, — падкрэсліў ён. — І для мяне таксама, як для выпускніка гэтага ўніверсітэта, маёй альма-матэр, гэта абсалютна ненармальная сітуацыя, якая не ўваходзіць ні ў якія межы. Гэта таксама ўдар па Літве і сведчанне таго, што рэжым працягвае эскалацыю як унутры Беларусі, так і ў адносінах з міжнароднымі партнёрамі і суседзямі”.
Кучынскі таксама адзначыў, што Офіс Ціханоўскай гатовы супрацоўнічаць з кіраўніцтвам ЕГУ і партнёрамі для пошуку рашэнняў, якія дазволяць навучальнай ўстанове “працягнуць сваю дзейнасць, нягледзячы на ціск з боку беларускіх уладаў”.
14 красавіка Вярхоўны суд прызнаў “экстрэмісцкімі” замежную арганізацыю “Еўрапейскі гуманітарны універсітэт” і структурныя падраздзяленні, якія ўваходзяць у яе склад. Пра гэта абвясціў Дзмітрый Брылёў — начальнік упраўлення Генеральнай пракуратуры, якая звярнулася ў суд з адпаведнай заявай на падставе закона “Аб супрацьдзеянні экстрэмізму”.
Наглядны орган паведаміў пра забарону дзейнасці ЕГУ “з выкарыстаннем сімволікі і атрыбутыкі” на тэрыторыі Беларусі.
“Універсітэт — свайго роду беларуская ВНУ ў выгнанні, гэтак яны сябе пазіцыянуюць, — аказвае метадычную, фінансавую ды іншую дапамогу прадстаўнікам радыкальна палітызаваных груповак, а таксама дэструктыўных замежных няўрадавых арганізацый, яго выкарыстоўваюць спецслужбы некаторых суседніх краін, каб нанесці шкоду інтарэсам Беларусі ў гуманітарнай, інфармацыйнай і палітычнай сферах”, — заявіў Брылёў.
ЕГУ, паводле сцвярджэння спікера, “выкарыстоўваюць і для таго, каб прасунуць альтэрнатыўныя трактоўкі гістарычных, культурных ды іншых падзей для дасягнення сваіх мэтаў”. Універсітэт нібыта “ўзаемадзейнічае з прадстаўнікамі экстрэмісцкіх і нават тэрарыстычных арганізацый”.
Паколькі праца ўніверсітэта “спалучаная з замахамі на суверэнітэт Беларусі, асновы канстытуцыйнага ладу і грамадскую бяспеку”, а “злачынныя дзеянні шэрагу яго выкладчыкаў і выпускнікоў пацверджаныя матэрыяламі крымінальных спраў пра распальванне сацыяльнай варожасці і варажнечы, пра заклікі да мер абмежавальнага характару, а таксама пра здзяйсненне іншых цяжкіх і асабліва цяжкіх злачынстваў”, суд дапусціў неадкладнае выкананне прынятага рашэння.
Еўрапейскі гуманітарны ўніверсітэт быў заснаваны ў Мінску ў 1992 годзе. 27 ліпеня 2004 года Міністэрства адукацыі Беларусі анулявала ліцэнзію ЕГУ на аказанне адукацыйных паслуг, пасля чаго дзейнасць універсітэта была адноўленая ў Літве.
ЕГУ быў заснаваны “з мэтай надання адукацыі студэнтам з Беларусі і больш шырокага рэгіёна Усходняй Еўропы”. Студэнты атрымліваюць акрэдытаваны дыплом Еўрапейскага саюза, які адкрывае магчымасці для прафесійнага і акадэмічнага развіцця па ўсёй Еўропе і па-за яе межамі, гаворыцца на сайце ЕГУ.
Кіраўнік МЗС Літвы выказаў гатоўнасць падтрымаць ЕГУ, прызнаны ў Беларусі "экстрэмісцкай арганізацыяй"
15 красавіка, Позірк. Рашэнне Мінска абвясціць Еўрапейскі гуманітарны універсітэт (ЕГУ), што працуе ў Вільнюсе, "экстрэмісцкай арганізацыяй" з'яўляецца абуральным, заявіў міністр замежных спраў Літвы Кястуціс Будрыс. Кіраўнік літоўскай дыпламатыі адзначыў на сваёй старонцы ў сацыяльнай сетцы Х, што такое рашэнне ў …
