Ва Украіне затрыманая інфарматар ФСБ РФ, на якую расійская спецслужба выйшла ў Беларусі — СБУ
15 красавіка, Позірк. У Данецкай вобласці затрыманая жанчына — інфарматар Федэральнай службы бяспекі (ФСБ) Расіі, паведаміла 15 красавіка Служба бяспекі Украіны (СБУ).
Паводле інфармацыі ведамства, яна працавала намесніцай дырэктара школы ў Краматорску (знаходзіцца ў падкантрольнай Украіне частцы Данецкай вобласці) і, як заяўлена, карэктавала ракетна-дронавыя атакі расійскіх войскаў па горадзе.
Расследаванне высветліла, што жанчына “трапіла ў поле зроку расійскай спецслужбы, калі ездзіла ў Беларусь на пачатку поўнамаштабнай вайны”.
Паведамляецца, што ўлетку 2025 года ФСБ “актывавала” супрацу і даручыла ёй адсочваць лакацыі ўкраінскіх сіл абароны ў прыфрантавым горадзе.
Для выканання задання яна, як сцвярджаецца, абыходзіла раённы цэнтр і фіксавала найбольшую колькасць асабовага складу і тэхнікі ўкраінскіх войскаў. Акрамя таго, жанчына “спрабавала завуалявана дазнацца выведніцкай інфармацыі праз знаёмых падчас бытавых размоў”.
Сабраныя звесткі яна “праз мэсэнджар перадавала куратару з РФ у выглядзе галасавых і тэкставых паведамленняў з пазначэннем лакацый патэнцыйных цэляў”.
Супрацоўнікі СБУ, як заяўлена, “задакументавалі злачынствы фігуранткі і затрымалі яе па месцы жыхарства”, адначасова “зробленыя захады па гарантаванні бяспекі лакацый украінскіх вайскоўцаў”.
Падчас вобшукаў у жанчыны выняты смартфон, які яна “выкарыстоўвала для збору выведніцкіх звестак і кантактаў з ФСБ”.
Затрыманая знаходзіцца ў статусе падазраванай паводле ч. 2 арт. 111 КК Украіны (дзяржаўная здрада, здзейсненая ва ўмовах ваеннага становішча). Яна ўзятая пад варту без права ўнясення закладу. Паводле інфармацыі СБУ, ёй пагражае пажыццёвае пазбаўленне волі з канфіскацыяй маёмасці.
Аляксандр Лукашэнка неаднаразова заяўляў, што Беларусь удзельнічае ў “спецыяльнай ваеннай аперацыі” ва Украіне, усяляк падтрымліваючы Расію, але “нікога не забіваючы”. Гэтым тэрмінам расійскае, а ўслед за ім і беларускае кіраўніцтва называюць поўнамаштабную вайну супраць украінскага народа, якую РФ распачала 24 лютага 2022 года. Разам з тым часам Лукашэнка наўпрост называе развязаны Расеяй канфлікт вайной.
Улады ў Мінску адмаўляюць удзел беларускай арміі ў баявых дзеяннях на баку РФ, у той жа час тэрыторыя Беларусі ад пачатку ўварвання, а таксама ў асобныя перыяды пазней актыўна выкарыстоўвалася расійскай арміяй для нанясення ўдараў па Украіне.
У першы год поўнамаштабнай вайны ў Беларусь праз беларуска-ўкраінскую мяжу, паводле даных Дзяржаўнага пагранічнага камітэта, уехала 15.890 грамадзян Украіны.
