НАУ просіць МУС у Гаазе вывучыць заявы Лукашэнкі аб прымусовай дэпартацыі палітвязняў
30 снежня, Позірк. Зварот з просьбай вывучыць шэраг публічных заяў Аляксандра Лукашэнкі, зробленых 18 снежня на VII Усебеларускім народным сходзе, накіравала Народнае антыкрызіснае ўпраўленне (НАУ) у офіс пракурора Міжнароднага крымінальнага суда ў Гаазе.
Каментуючы на УНС вызваленне і высылку 123 палітвязняў, Лукашэнка заявіў, што адхіліў просьбу ЗША дазволіць гэтым людзям — грамадзянам Беларусі — застацца ў краіне, адзначае НАУ.
Ён таксама “зноў пацвердзіў, што вызваленым не павінна быць прадастаўленая магчымасць вяртання ў Беларусь і што тым, хто выязджае з краіны, наўмысна адмаўляюць у выдачы пашпартоў, выстаўляючы іх “ворагамі”.
“Народнае антыкрызіснае ўпраўленне мяркуе, што дадзеныя заявы служаць дадатковым доказам мэтанакіраванай палітыкі беларускіх уладаў па пераследзе і дэпартацыі асоб, прызнаных нелаяльнымі”, — заяўляе НАУ.
Падкрэсліваецца, што рэжым Лукашэнкі “фактычна незаконна пазбаўляе людзей волі, незаконна дэпартуе іх за межы ўласнай краіны, забараняе вяртацца пад пагрозай новых крымінальных пераследаў, незаконна пазбаўляе дакументаў”.
Усе гэтыя заявы Лукашэнкі ў НАУ кваліфікуюць “не як рыторыку, а як дадатковыя доказы мэтанакіраванай дзяржаўнай палітыкі пераследу, дэпартацыі і прымусовага перамяшчэння грамадзянскага насельніцтва”, што з’яўляецца “прамымі прыкметамі злачынстваў супраць чалавечнасці ў разуменні Рымскага статута Міжнароднага крымінальнага суда”.
“Лукашэнка сам, публічна, на камеру, крок за крокам фарміруе даказальную базу супраць сябе. Наша задача — юрыдычна правільна яе зафіксаваць і перадаць туды, дзе за гэта выносяць прысуды, а не апладзіруюць”, — заяўляе НАУ.
Паводле слоў кіраўніка арганізацыі Паўла Латушкі, ён разам з калегамі працягне дамагацца таго, каб “ні адно злачынства супраць беларусаў не засталося без прававой ацэнкі”.
13 снежня 2025 года ў рамках дамоўленасцяў паміж Мінскам і Вашынгтонам Лукашэнка вызваліў 123 чалавекі (110 грамадзян Беларусі і 13 замежнікаў) з умовай іх наступнага ад’езду з краіны.
109 беларусаў і пяць украінцаў прыбылі на тэрыторыю Украіны. Яшчэ адзін палітвязень, лаўрэат Нобелеўскай прэміі міру, кіраўнік праваабарончага цэнтра “Вясна” Алесь Бяляцкі быў высланы ў Літву.
Вялікая група з 89 беларускіх палітвязняў у ноч на 18 снежня прыбыла з Украіны ў Варшаву.
Сярод тых, хто прыбыў у польскую сталіцу, былі Марыя Калеснікава і Віктар Бабарыка, якія пасля з’ехалі ў Германію.
20 чалавек прыехала ў Вільнюс.
Праваабарончая кааліцыя з 11 арганізацый запатрабавала ад уладаў Беларусі спыніць практыку прымусовай высылкі беларускіх грамадзян, вызваленых у выніку памілавання.
Лукашэнка заявіў, што пашпарты палітвязням, якіх высылаюць з краіны, не аддаюць свядома і што ім не дадуць вярнуцца на радзіму
18 снежня, Позірк. Пашпарты палітвязням, якіх вызваляюць і высылаюць з краіны, не аддаюць свядома, прызнаўся Аляксандр Лукашэнка, адказваючы на пытанні ўдзельнікаў другой сесіі VII Усебеларускага народнага сходу 18 снежня. “Яны (асуджаныя з палітычных матываў. — "Позірк".) нам не патрэбныя. Калі …
