1 ліпеня, Позірк. Следчы камітэт 1 ліпеня распачаў спецыяльную вытворчасць у дачыненні да сузаснавальніка і былога топ-менеджара кампаніі Wargaming Мікалая Кацалапава.
Прэс-служба СК паведамляе, што Кацалапаў абвінавачваецца паводле ч. 1 і ч. 2 арт. 361² (фінансаванне экстрэмісцкай дзейнасці) і ч. 2 арт. 290¹ (фінансаванне тэрарыстычнай дзейнасці) Крымінальнага кодэкса.
Мужчыну прапанавана з’явіцца па адрасе, дзе знаходзіцца ўпраўленне СК па Мінску.
Пачатак спецвытворчасці з наступным завочным судом у дачыненні да Кацалапава, які знаходзіцца за мяжой, быў анансаваны ў сюжэце “Цень. Цана тэрору” на тэлеканале АНТ 2 красавіка.
Тады ён быў прадстаўлены як “топ-менеджар вядомай IT-кампаніі “Геймстрым”. Паведамлялася, што яму прад’яўлена абвінавачанне паводле некалькіх артыкулаў КК за данаты. Як адзначала выданне “Наша Ніва”, у сюжэце сцвярджалася, што мужчына зрабіў “дзясяткі пераводаў” у крыптавалюце на “сотні тысяч долараў” у розныя ініцыятывы, прызнаныя “экстрэмісцкімі”.
29 снежня мінулага года КДБ унёс Кацалапава ў “спіс асоб, датычных да тэрарыстычнай дзейнасці”. Тады адзначалася, што ён абвінавачваецца паводле арт. 290¹ КК.
Працэдура спецвытворчасці ў Беларусі прымянялася ў дачыненні да 148 чалавек. Гэта вытворчасць паводле крымінальнай справы ў дачыненні да абвінавачанага, які знаходзіцца па-за межамі Беларусі і ўхіляецца ад яўкі ў орган, што вядзе крымінальны працэс. Магчымая паводле 34 складаў злачынстваў, якія пераважна адносяцца да катэгорыі цяжкіх і асабліва цяжкіх. Сярод іншага гэта акт тэрарызму, генацыд, наёмніцтва, здрада дзяржаве, дыверсія, стварэнне экстрэмісцкага фарміравання або ўдзел у ім, масавыя беспарадкі, заклікі да санкцый і інш.
