3 чэрвеня, Позірк. У выніку дажджу і моцнага ветру з парывамі да 15–20 м/с у Гомельскай вобласці 3 чэрвеня павалена 20 дрэў, паведамляе Міністэрства па надзвычайных сітуацыях.
Паводле звестак ведамства, 12 дрэў упала ў абласным цэнтры, 6 — у Рэчыцкім раёне, па адным — у Ельскім і Лельчыцкім раёнах.
Адзначаецца, што ў абласным цэнтры чатыры дрэвы ўпалі на аўтамабілі. Таксама зафіксавана пашкоджанне даху на трох будынках у Гомелі і Лельчыцкім раёне.
Выпадкаў траўмавання людзей не зафіксавана.
У пяці месцах супрацоўнікі МНС удзельнічалі ў прыборцы і распілоўцы паваленых дрэў: у Гомелі, Лельчыцкім і Ельскім раёнах.
Выпадкаў адключэння электразабеспячэння па стане на 16:00 не зафіксавана.
“Белгідрамет” папярэджваў, што ўдзень 3 чэрвеня “ў паўднёвых раёнах краіны чакаюцца моцныя дажджы, месцамі ў Гомельскай вобласці — вельмі моцныя дажджы”. “У перыяд з 14 гадзін 30 хвілін да 19 гадзін на паўднёвым усходзе чакаюцца навальніцы, пры навальніцах месцамі град і шквалістае ўзмацненне ветру з парывамі 15–20 м/с. Навальнічная абстаноўка захаваецца да 23 гадзін”, — паведамілі ў арганізацыі. Быў абвешчаны аранжавы ўзровень небяспекі.
