27 ліпеня, Позірк. У сувязі з ростам бюджэту пражытковага мінімуму (з 1 жніўня) павялічацца памеры дзяржаўных дапамог сем’ям, якія выхоўваюць дзяцей. Як адзначае Міністэрства працы і сацыяльнай абароны, павелічэнне складзе 4,1%.
Дапамога ў сувязі з нараджэннем першага дзіцяці — 10 БПМ (5.303,7 рубля), пры нараджэнні другога і наступных дзяцей — 14 БПМ (7.425,18 рубля). Абедзве дапамогі выплачваюцца аднаразова.
Дапамога жанчынам, якія сталі на ўлік у арганізацыях аховы здароўя да 12-тыднёвага тэрміну цяжарнасці (аднаразовая), — 100% БПМ (530,37 рубля).
Штомесячная дапамога сем’ям у перыяд выхавання дзіцяці да 3 гадоў — 50% БПМ (265,19 рубля). Такі ж памер рэгулярнай дапамогі на дзяцей, якім больш за 3 гады, з асобных вызначаных дзяржавай катэгорый сем’яў, а на дзіця з інваліднасцю ва ўзросце ад 3 гадоў, — 70% БПМ (371,26 рубля).
Дапамога па доглядзе дзіцяці з інваліднасцю ва ўзросце да 18 гадоў (штомесячная): пры I і II ступені страты здароўя да дасягнення паўналецця, а таксама пры III і IV ступені ва ўзросце да 3 гадоў — 100% БПМ (530,37 рубля); пры III і IV ступені, старэйшым за 3 гады, — 120% БПМ (636,44 рубля).
Штомесячная дапамога на дзяцей з вірусам імунадэфіцыту чалавека — 70% БПМ (371,26 рубля).
Мінпрацы адзначыла, што дапамогі, якія вылічваюцца з БПМ, выплачваюцца на 154,8 тыс. дзяцей ва ўзросце ад 3 да 18 гадоў.
Павялічацца таксама “ўзроставыя” даплаты да пенсій, якія атрымліваюць амаль 570 тыс. чалавек ва ўзросце ад 75 гадоў і больш.
Для асоб ва ўзросце 75–79 гадоў яны складуць 99,44 рубля (пры наяўнасці інваліднасці I групы — 232,03 рубля); ва ўзросце 80 гадоў і больш (з улікам надбаўкі на догляд) — 198,89 рубля (пры інваліднасці I групы — 265,18 рубля).
Паводле ацэнак спецыялістаў, выдаткі на “ўзроставыя” даплаты ў 2026 годзе складуць 980 млн рублёў.
Раней паведамлялася, што з 1 жніўня БПМ у сярэднім на душу насельніцтва на перыяд з 1 жніўня па 31 кастрычніка 2026 года вызначаныя на ўзроўні 530,37 рубля. З 1 красавіка па 31 ліпеня 2026 года БПМ складае 509,62 рубля. Такім чынам, у сярэднім на душу насельніцтва БПМ вырасце на 20,75 рубля, або на 4,1%.
Гэтая велічыня будзе дзейнічаць па 31 кастрычніка.
