Улады бачаць “мноства дэзінфляцыйных фактараў”, сцвярджае Галоўчанка
Кіраўнік Нацбанка Раман Галоўчанка
27 ліпеня, Позірк. Зараз “траекторыя інфляцыі ідзе нават ніжэй” вызначанай мэты, заявіў у інтэрв’ю тэлеканалу “Беларусь 1” кіраўнік Нацыянальнага банка Раман Галоўчанка (сюжэт выйшаў у эфір 26 ліпеня).
Паводле яго сцвярджэння, улады бачаць “мноства дэзінфляцыйных фактараў”, аднак “элемент неспакойнасці заўсёды крыху блытае прагнозы”.
“Пакуль мы пачуваемся дастаткова спакойна, — падкрэсліў кіраўнік рэгулятара. — І базавая інфляцыя, і агульная інфляцыя, і самае галоўнае — інфляцыйныя чаканні насельніцтва — маркер, які сведчыць пра ўстойлівасць дэзінфляцыйных працэсаў, пакуль нас цешаць”.
Зыходзячы з гэтага, патлумачыў спікер, ідзе “рух уніз” і “па стаўцы”: “Я маю на ўвазе не стаўку рэфінансавання Нацыянальнага банка. У цэлым банкі, бачачы рыначную сітуацыю, зніжаюць кошт крэдытных рэсурсаў. Гэта таксама адпавядае нашым мэтам”.
Галоўчанка падкрэсліў, што ў банкаўскай сістэме цяпер сфармаваўся “істотны прафіцыт ліквіднасці”, у тым ліку і на інвестыцыйныя мэты: “Нягледзячы на тое, што мы да свайго ж плана ўжо ў два разы за паўгоддзе нарасцілі інвестыцыйнае крэдытаванне”.
“Рэзервы маюцца і ў Нацыянальным банку, і ў банкаўскай сістэме, і ў бюджэце. Пытанне толькі ў правільных кірунках іх выкарыстання. Усе праекты, якія фінансуюцца за кошт інвестыцыйных крэдытаў, натуральна маюць быць пралічаныя і акупляемыя”, — канстатаваў кіраўнік рэгулятара.
Спажывецкія цэны ў чэрвені 2026 года павялічыліся на 0,3%, у параўнанні са снежнем 2025-га рост склаў 2,9%, у гадавым вымярэнні (да чэрвеня 2025-га) — 4,3%.
Летась інфляцыя склала 6,8%. Згодна з найважнейшымі прагнознымі (дэ-факта — планавымі) параметрамі развіцця краіны на мінулы год, паказчык не меўся перавысіць 5%.
На гэты год ліміт інфляцыі запланаваны на ўзроўні 7%.
6 кастрычніка 2022 года Аляксандр Лукашэнка па выніках нарады пра цэнавую сітуацыю ў краіне падпісаў дырэктыву № 10 “Аб недапушчальнасці росту цэн”.
Пастановай урада ад 19 кастрычніка 2022-га № 713 “Аб сістэме рэгулявання цэн” было ўведзенае рэгуляванне цэн на тавары ўсяго спажывецкага кошыка. Пазней у дакумент неаднаразова ўносіліся змены: з яго былі выключаныя многія групы тавараў, падкарэктаваныя правілы рэгулявання цэн.
Рыжычэнка: У другім паўгоддзі можна чакаць росту цэн — цяперашняя інфляцыя не адпавядае рэчаіснасці
Апублікавана на адкрытай версіі "Позірку" 20 ліпеня 2026 года ў 11:33 19 ліпеня, Позірк. У другой палове 2026 года можна чакаць росту цэн, бо інфляцыя, пра якую справаздачацца ўлады, “зусім не адпавядае рэчаіснасці”, заявіла ў каментарыі “Позірку” прадстаўнік Аб'яднанага пераходнага …
