24 лютага, Позірк. Наступствы аварыі на падстанцыі “Кобрын — Заходняя” ліквідаваныя, вынікае з паведамлення, апублікаванага прэс-службай Міністэрства энергетыкі 24 лютага ў 13:26.
Ведамства адзначыла, што “раніцай у выніку тэхналагічнага парушэння ў працы абсталявання” на згаданай падстанцыі (110 кВ) “часова адсутнічала электразабеспячэнне часткі спажыўцоў раённага цэнтра”.
“Энергетыкі прадпрыемства “Брэстэнерга” аператыўна пачалі выкананне работ і цалкам аднавілі электразабеспячэнне ўсіх спажыўцоў. Электра- і цеплазабеспячэнне горада ажыццяўляецца ў поўным аб’ёме. У працах было задзейнічана больш за 40 чалавек персаналу і 6 адзінак тэхнікі”, — заявіла Мінэнерга.
За гадзіну да рэакцыі энергетычнага ведамства Міністэрства па надзвычайных сітуацыях паведаміла, што аварыйнае адключэнне падстанцыі адбылося ўначы 24 лютага. Адзначалася, што інцыдэнт прывёў да абясточвання 88 трансфарматарных падстанцый, чатырох устаноў сярэдняй адукацыі і пяці ўстаноў дашкольнай адукацыі, аб’ектаў гандлю, а таксама больш за 7 тыс. абанентаў прыватнага сектара.
Да таго моманту, паводле інфармацыі МНС, было адноўлена электразабеспячэнне школ і дзіцячых садкоў, але без святла заставалася 500 абанентаў у прыватным сектары.
Аўтарызавацца
Забыліся пароль?
Выхад з профілю
