26 лістапада, Позірк. У расійскую базу вышуку за апошнія шэсць месяцаў дададзеныя 773 грамадзяніны Беларусі, паведамляе “Медыязона. Беларусь”.
Усяго ў базе РФ цяпер 4.402 чалавека.
Сярод іншых у базу ўключаныя Павел Шурмей і Дзяніс Прохараў — адпаведна дзеючы і былы камандзіры ваюючага ва Украіне палка імя Кастуся Каліноўскага (ПКК).
Таксама ў Расіі абвешчаны ў вышук былы баец ПКК Васіль Верамейчык, у гэтым месяцы экстрадаваны ў Беларусь з В’етнама ў выніку аперацыі КДБ.
Акрамя асоб, звязаных з добраахвотніцкімі падраздзяленнямі ва Украіне, у базу вышуку РФ унесеныя палітыкі, актывісты, былыя палітвязні, журналісты, а таксама сваякі рэпрэсаваных.
У базу дададзеныя журналісты-расследвальнікі праекта “Бюро медыя” Аляксандр Ярашэвіч, Ксенія Вязнікоўцава, Аляксей Карпека і Вольга Альхіменка. У вышуку знаходзяцца трое прадстаўнікоў Беларускага расследвальніцкага цэнтра: яго заснавальнік Станіслаў Івашкевіч, кіраўнік сайта Лола Бурыева і вядучая праграмы Weekly Top Fake Алена Чарняўская.
У спіс тых, каго адшукваюць, уключаныя прадстаўнікі беларускай службы “Радыё Свабода”: былы кіраўнік Аляксандр Лукашук, экс-дэпутат Вярхоўнага савета, публіцыст Сяргей Навумчык, журналіст і літрэдактар Сяргей Дубавец. Таксама ў вышуку журналістка Кацярына Пытлева і фатограф Аляксандр Васюковіч.
РФ вышуквае палітыка Вячаслава Сіўчыка, былога турэмнага лекара Васіля Завадскага, палітычнага аналітыка Вадзіма Мажэйку, а таксама завочна асуджанага на 10 гадоў зняволення па справе “аналітыкаў Ціханоўскай” Алеся Лагвінца.
13 лютага паведамлялася, што ў базе вышуку расійскага МУС фігуравалі імёны 3.186 грамадзян і ўраджэнцаў Беларусі, да траўня ў базу дадалі яшчэ больш за 400 грамадзян Беларусі.
6 лютага амбасадар Беларусі ў Расіі Дзмітрый Круты (цяпер кіраўнік адміністрацыі Аляксандра Лукашэнкі) заявіў, што Мінск і Масква вядуць працу над аб’яднаннем “спісаў экстрэмістаў і экстрэмісцкіх рэсурсаў”. Ён выказаў надзею, што “найбліжэйшым часам гэта будзе вырашана”.
