Вярхоўная Рада ўхваліла законапраект, які спрашчае легалізацыю добраахвотнікаў ва Украіне

20 жніўня, Позірк. Законапраект “аб прававым статусе замежнікаў і асоб без грамадзянства, якія ўдзельнічаюць у абароне тэрытарыяльнай цэласнасці і недатыкальнасці Украіны” падтрымала 20 жніўня Вярхоўная Рада, паведаміла ў сваім тэлеграм-канале дэпутат ад партыі “Еўрапейская салідарнасць” Ірына Герашчанка.

Дакумент ухвалены 315 галасамі, адзначыла палітык.

Паводле яе слоў, замежнікам і асобам без грамадзянства, якія абараняюць Украіну, будзе дазволена “атрымліваць віды на часовае пражыванне або іміграваць, нават калі іх дакументы пратэрмінаваныя”.

Права на часовае пражыванне ва Украіне таксама будзе прадстаўлена членам іх сем’яў, падкрэсліла Герашчанка.

Пры гэтым грамадзян Беларусі і Расіі, якія атрымалі ўкраінскі пашпарт, законапраект абавязвае на працягу года пасля адмены ваеннага становішча “падаць дакументы аб адмове ад замежнага грамадзянства”, адзначыла парламентарый.

На прыняцце законапраекта адрэагаваў былы намеснік камандзіра палка імя Кастуся Каліноўскага, прадстаўнік Аб’яднанага пераходнага кабінета па абароне і нацыянальнай бяспецы Вадзім Кабанчук.

“За законапраект прагаласавалі амаль аднагалосна. Дзякуй дэпутатам Вярхоўнай Рады за падтрымку доўгачаканага рашэння! Асаблівая падзяка за лабіраванне дэпутатам з міжфракцыйнай групы “За дэмакратычную Беларусь”!” — напісаў Кабанчук на сваёй старонцы ў “Фэйсбуку”.

9 траўня дэпутаты ВР прынялі ў першым чытанні законапраект з папраўкамі ў законы, якія тычацца “прававога статусу замежнікаў і асоб без грамадзянства, якія ўдзельнічаюць у абароне тэрытарыяльнай цэласнасці і недатыкальнасці Украіны”.

Кіраўнік міжфракцыйнага аб’яднання “За дэмакратычную Беларусь” дэпутат Аляксей Ганчарэнка паведаміў, што папраўкі падтрымалі 263 парламентарыі (актуальны склад ВР — 401).

Ва Украіне супраць расійскай агрэсіі ваюе некалькі беларускіх добраахвотніцкіх фарміраванняў, найбольш вядомае з якіх — полк Каліноўскага, які ўваходзіць у склад УСУ (байцы падпісваюць кантракт).