Прэс-сакратар Лукашэнкі працуе над стварэннем інфармацыйнага канала БТ

28 чэрвеня, Позірк. Стварэнне на базе Белтэлерадыёкампаніі інфармацыйнага канала анансавала прэс-сакратар Аляксандра Лукашэнкі Наталля Эйсмант у інтэрв’ю праграме “СКАЖИНЕМОЛЧИ” на “Беларусь 1” 28 чэрвеня.

Ужо адбылася закрытая прэзентацыя канала, рыхтуецца адпаведная студыя, адзначыла яна.

Эйсмант паведаміла, што займаецца праектам яна разам з намеснікам кіраўніка Адміністрацыі прэзідэнта Уладзімірам Пярцовым, які пачаў працу над ім яшчэ на пасадзе міністра інфармацыі, старшынёй Белтэлерадыёкампаніі Іванам Эйсмантам і “пулам кіраўнікоў, які прыцягнуты для ўдзелу ў яго рэалізацыі”.

Прэс-сакратар Лукашэнка назвала стварэнне інфармацыйнага канала “знакавым праектам для ўсёй медыйнай сферы” і выказала пажаданне, каб гэта была “жывая, аператыўная пляцоўка”, на якой было б “шмат трансляцый аб найважнейшых палітычных падзеях”.

Пра тое, што “новы тэлеканал для прапаганды запусцяць у Беларусі”, паведаміў у сакавіку са спасылкай на свае крыніцы тэлеграм-канал “МатолькоПомоги”.

Пярцоў, які да гэтага быў міністрам інфармацыі, прызначаны на цяперашнюю пасаду ў красавіку.