Ціханоўская: Лукашэнка здрадзіў Арменіі гэтак жа, як Украіне

13 чэрвеня, Позірк. Аляксандр Лукашэнка здрадзіў Арменіі гэтак жа, як Украіне, такое меркаванне выказала дэмакратычны лідар Святлана Ціханоўская, каментуючы адмову армянскага прэм’ер-міністра Нікола Пашыняна калі-небудзь наведваць Беларусь.

“Свету патрэбная свабодная і дэмакратычная Беларусь як надзейны партнёр, а не вераломны дыктатар”, — напісала палітык на сваёй старонцы ў сацыяльнай сетцы Х.

Намеснік кіраўніцы Аб’яднанага пераходнага кабінета Валерый Кавалеўскі падзякаваў Пашыняну “за прынцыповую палітычную пазіцыю”.

“Ніводны нацыянальны лідар не павінен паціскаць руку Лукашэнку — дыктатару і агрэсару — або наведваць Беларусь, пакуль там маюцца палітычныя вязні, ідуць рэпрэсіі, мільёны беларусаў не могуць вярнуцца дадому, а рэжым удзельнічае ў агрэсіўнай вайне супраць Украіны”, — падкрэсліў ён.

13 чэрвеня Пашынян заявіў, што ні ён, ні які-небудзь іншы афіцыйны прадстаўнік краіны не паедзе ў Беларусь, пакуль ва ўладзе ў Мінску знаходзіцца Аляксандр Лукашэнка. Кіраўнік армянскага ўрада сказаў пра гэта ў кантэксце заяў Лукашэнкі пра карабахскі канфлікт на сустрэчы з прэзідэнтам Азербайджана Ільхамам Аліевым у сярэдзіне траўня.

Пасля заявы Пашыняна амбасадар Арменіі ў Беларусі Размік Хумаран быў выкліканы ў Ерэван для кансультацый.

12 чэрвеня Ціханоўская вітала рашэнне Арменіі “замарозіць удзел ва ўзначаленай Масквой” Арганізацыі Дагавора аб калектыўнай бяспецы (АДКБ). Такім чынам яна адрэагавала на выступ Пашыняна, які абвінаваціў АДКБ у тым, што асобныя члены “планавалі вайну” супраць Арменіі з Азербайджанам, і паведаміў пра магчымы выхад з блока.

“Гэты крок падкрэслівае прыхільнасць Арменіі да свайго нацыянальнага суверэнітэту. Армянскі народ заслугоўвае свабоднай, дэмакратычнай і мірнай будучыні ў Еўропе. Спадзяюся на больш шчыльную супрацу з Арменіяй”, — адзначыла палітык.

Пра жаданне больш працаваць з Ерэванам Ціханоўская ўжо заяўляла сёлета ў сакавіку — на сустрэчы са спікерам парламента Арменіі Аленам Сіманянам на палях кангрэса Euronest.

24 лютага 2022 года Расія пачала поўнамаштабную вайну супраць Украіны. На першапачатковым этапе ўварвання беларуская тэрыторыя актыўна выкарыстоўвалася для ўводу войскаў, а таксама абстрэлу ўкраінскай тэрыторыі. Лукашэнка неаднаразова заяўляў, што падтрымлівае РФ у яе дзеяннях.

Афіцыйны Мінск актыўна супрацоўнічае з Баку, у тым ліку ў ваеннай сферы, нягледзячы на тое, што фармальна з’яўляецца саюзнікам Арменіі, якая фактычна варагуе з Азербайджанам.