Кіраўнік МЗС Літвы фактычна прызнаў за Украінай права біць па вайсковых цэлях у РФ і Беларусі
31 траўня, Позірк. Украіна дзеля сваёй абароны можа біць па вайсковых цэлях, якія знаходзяцца ў Расіі і Беларусі, вынікае са слоў міністра замежных спраў Літвы Габрыэлюса Ландсбергіса 31 траўня перад сустрэчай кіраўнікоў МЗС краін НАТО ў Празе.
Такім чынам чыноўнік адказаў на пытанне “Радыё Свабода”, ці мусіць Украіна паражаць у тым ліку цэлі ў Беларусі.
“Я маю на ўвазе тое, што Украіна павінна мець здольнасць абараняцца. Калі Расія, баючыся, што цэлі могуць быць пад ударам у Расіі, можа перанесці іх некуды яшчэ, то я думаю, што выбар [Украінай] цэляў мусіць быць перанесены таксама”, — заявіў кіраўнік МЗС Літвы.
24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль. З беларускай тэрыторыі расійскае войска ажыццявіла прамы напад на суседнюю краіну, затым на працягу некалькіх месяцаў праводзіліся ракетныя абстрэлы ўкраінскіх гарадоў. Таксама расійскія вайскоўцы карысталіся беларускай вайсковай інфраструктурай.
У жніўні 2022 года міністр абароны Украіны Аляксей Рэзнікаў (сышоў у адстаўку ў верасні 2023-га) заявіў выданню Washington Post, што беларускі калега Віктар Хрэнін тэлефанаваў яму 22 лютага і “даў слова афіцэра”, што нападу РФ з тэрыторыі Беларусі не будзе.
Украіна намагаецца атрымаць ад заходніх партнёраў дазвол на выкарыстанне перададзенай імі зброі для паражэння цэляў на тэрыторыі РФ.
31 траўня DW са спасылкай на афіцыйнага прадстаўніка ўрада ФРГ Штэфена Хебештрайта паведаміла, што Украіна можа выкарыстоўваць перададзеную ёй зброю па расійскіх аб’ектах, кабінет міністраў ухваліў адпаведнае рашэнне.
