Польская пракуратара хоча падключыць Інтэрпол да вышуку экс-суддзі Шмыта, які ўцёк у Беларусь
22 траўня, Позірк. Галоўнае ўпраўленне паліцыі Польшчы атрымала патрабаванне пракуратуры ўключыць экс-суддзю Томаша Шмыта, што ўцёк у Беларусь, у спіс асоб, якія адшукваюцца Інтэрполам з “чырвоным апавяшчэннем”, паведамляе RMF24 са спасылкай на прэс-сакратара паліцыі Катажыну Новак.
Паводле інфармацыі Новак, упраўленне міжнароднага паліцэйскага супрацоўніцтва правядзе тэхнічную праверку заяўкі. Сярод іншага будзе праверана, ці ўтрымлівае яна ўсе неабходныя элементы — інфармацыю пра выстаўленыя абвінавачванні, абраную меру стрымання, часовы арышт, абгрунтаванне, фатаздымак. Пасля гэтага паліцыянты ўнясуць заяўку ў базу даных Інтэрпола.
Міжнароднае ведамства мае 30 дзён на праверку заявы, пасля чаго “чырвонае апавяшчэнне набудзе моц”, заявіла Новак. Пры гэтым яна сказала, што працэдуры Інтэрпола, як паказвае практыка, “звычайна цягнуцца да пяці дзён”.
Інтэрпол апісвае “чырвонае апавяшчэнне” як “запыт да праваахоўных органаў краін свету пра вызначэнне месцазнаходжання і папярэдні арышт асобы ў чаканні экстрадыцыі, выдачы або аналагічнага прававога дзеяння”.
У сярэдзіне траўня Варшаўскі акруговы суд задаволіў хадайніцтва пракуратуры пра завочны арышт Шмыта на тры месяцы, пасля гэтага наглядны орган абвесціць экс-суддзю ў вышук на тэрыторыі Польшчы і будзе дамагацца выдачы еўрапейскага ордара на яго арышт.
Інфармацыя пра тое, што суддзя 2-га аддзялення Ваяводскага адміністрацыйнага суда Варшавы Шмыт “пакуль неафіцыйна” папрасіў “статус палітычнага ўцекача” ў Беларусі, з’явілася 6 траўня ў тэлеграм-канале, створаным на тры дні раней ад яго імя на польскай і рускай мовах.
Паводле публікацыі, Шмыт вымушана пакінуў Польшчу “з прычыны нязгоды з палітыкай і дзеяннямі ўладаў”. Ён нібыта “зазнаў пераслед і пагрозы за самастойную палітычную пазіцыю”.
