Усе, хто пераследваў беларускіх калег, павінны паўстаць перад правасуддзем — кіраўнік Саюза журналістаў Літвы
Кіраўнік СЖЛ Дайнюс Радзявічус (у цэнтры), старшыня БАЖ Андрэй Бастунец (злева) і яго намеснік Барыс Гарэцкі (справа)
3 траўня, Позірк. Міжнародная супольнасць і арганізацыі, Еўрасаюз і тыя, хто прымае рашэнні, павінны пастаянна ціснуць на рэжым Аляксандра Лукашэнкі, каб дабіцца вызвалення прадстаўнікоў беларускага медыясектара, заявіў старшыня Саюза журналістаў Літвы (СЖЛ) Дайнюс Радзявічус на брыфінгу 3 траўня ў Вільнюсе, прымеркаваным да Сусветнага дня свабоды прэсы.
Брыфінг прайшоў ва ўнутраным дворыку Лукішскай турмы (да сярэдзіны 2019 года функцыянавала як следчы ізалятар, у 2021 годзе стала экскурсійным аб’ектам) у рамках акцыі салідарнасці з беларускімі журналістамі, якія знаходзяцца ў няволі.
Паводле слоў Радзявічуса, усе, хто мае дачыненне да пераследу прадстаўнікоў беларускага медыясектара — “пракуроры, суддзі, следчыя, тыя, хто пісаў скаргі,” — у будучыні павінны паўстаць перад правасуддзем. “Да гэтага мы павінны імкнуцца, пра гэта мы павінны казаць, паказваць. <…> Гэта злачынства супраць чалавечнасці”, — сказаў ён.
Кіраўнік СЖЛ падзякаваў літоўскім і беларускім калегам за салідарнасць і заклікаў казаць “не пра лічбы, колькі журналістаў зараз у турмах беларускіх”, а паказваць “асобы, імёны, прозвішчы, лёсы гэтых людзей”.
“Кожнага з нашых калег мы фізічна вызвалім хаця б тут, [дапаможам] з гэтай турмы выйсці на волю”, — заявіў Радзявічус, пасля чаго ўдзельнікі акцыі салідарнасці вынеслі партрэты беларускіх журналістаў, якія знаходзяцца ў зняволенні, з тэрыторыі былой пенітэнцыярнай установы.
Кіраўнік літоўскага журналісцкага аб’яднання таксама паведаміў, што старшыня Беларускай асацыяцыі журналістаў (БАЖ) Андрэй Бастунец стаў членам СЖЛ (“мы ганарымся і рады, што ён уступіў”). У сваю чаргу Радзявічус папрасіў прыняць яго ў шэрагі БАЖ.
“Я вельмі шаную тое, што ваша арганізацыя свабодная — у Вільнюсе, Літве і свеце. Адзіная краіна, дзе вы прызнаныя “экстрэмісцкай арганізацыяй”, — гэта Беларусь. Але я рады быць у такой кампаніі, я думаю, што я павінен разам з вамі быць такім жа добрым “экстрэмістам” да той пары, пакуль мы не станем проста журналістамі”, — сказаў ён.
Паводле даных БАЖ, зараз у няволі 35 прадстаўнікоў беларускай медыясферы.
Беларусь апусцілася на 10 пазіцый у індэксе свабоды прэсы "Рэпарцёраў без межаў"
3 траўня, Позірк. Беларусь заняла 167-е месца ў Сусветным індэксе свабоды прэсы 2024 года, які склала міжнародная арганізацыя "Рэпарцёры без межаў" (RSF). Беларусь знаходзіцца паміж Саудаўскай Аравіяй і Кубай. У індэксе-2023 Беларусь займала 157-е месца, у 2022 годзе — 153-е. …
