Беларусь апусцілася на 10 пазіцый у індэксе свабоды прэсы “Рэпарцёраў без межаў”

3 траўня, Позірк. Беларусь заняла 167-е месца ў Сусветным індэксе свабоды прэсы 2024 года, які склала міжнародная арганізацыя “Рэпарцёры без межаў” (RSF).

Беларусь знаходзіцца паміж Саудаўскай Аравіяй і Кубай.

У індэксе-2023 Беларусь займала 157-е месца, у 2022 годзе — 153-е.

У RSF адзначылі, што “крыжовы паход супраць незалежнай журналістыкі” прадаўжае Расія (162-е месца), і ў “гэтай зоне з Расіяй супернічаюць толькі дзве дзяржавы: Беларусь (167-е месца), чый рэжым пераследуе журналістаў на падставе барацьбы з “экстрэмізмам”, і Туркменістан (175-е месца), дзе прэзідэнт, які валодае неабмежаванымі паўнамоцтвамі забараняе любую незалежную інфармацыю”.

Першыя дзесяць месцаў у рэйтынгу займаюць у парадку змяншэння: Нарвегія, Данія, Швецыя, Нідэрланды, Фінляндыя, Эстонія, Партугалія, Ірландыя, Швейцарыя, Германія.

Горш за ўсё сітуацыя са свабодай прэсы ў Егіпце, М’янме, Кітаі, Бахрэйне, В’етнаме, Туркменістане, Іране, Паўночнай Карэі, Афганістане, Сірыі і Эрытрэі.

Паводле звестак Беларускай асацыяцыі журналістаў, цяпер за кратамі знаходзіцца 35 прадстаўнікоў СМІ.

3 мая адзначаецца Сусветны дзень свабоды прэсы.