1 лютага, Позірк. У студзені на волю выйшла не менш 35 палітвязняў, якія цалкам адбылі тэрміны пакарання, двое з іх правялі за кратамі больш за тры гады, паведаміў праваабарончы цэнтр “Вясна”.
Сярод іншых, адзначаюць праваабаронцы, выйшлі на волю актывістка прафсаюза РЭП Зінаіда Міхнюк, блогер Андрэй Бяляўскі, Арцём Ткачук, Аляксандр Бабіч, Аляксандр Лучыновіч.
“Толькі дзве палітзняволеныя жанчыны ў мінулым месяцы выйшлі на волю з СІЗА пасля суда — Ксенія Рыжык і Ганна Чаркас”, — падкрэслілі праваабаронцы, ім прызначылі пакаранне без накіравання ў папраўчую ўстанову. Але гэтыя дадзеныя могуць быць няпоўныя, бо “не ўсе вынікі судоў над палітвязнямі пакуль вядомыя”.
Паводле інфармацыі “Вясны”, у студзені суды “ў абсалютнай большасці прызначалі палітвязням пазбаўленне волі”.
На 1 лютага ў Беларусі 1.415 палітвязняў.
