Офіс Ціханоўскай правядзе ў Празе трэцюю канферэнцыю беларускіх дыяспар

25 студзеня, Позірк. 23–24 сакавіка ў Празе офіс Святланы Ціханоўскай правядзе трэцюю дыяспаральную канферэнцыю, паведамляе прэс-служба дэмакратычнага лідара.

Адзначаецца, што мэта канферэнцыі — “сабраць прадстаўнікоў беларускіх дыяспар свету, абмеркаваць актуальныя пытанні і вызначыць кірункі супрацоўніцтва”.

Паводле інфармацыі арганізатараў, падрыхтоўка ўжо пачалася, а летась да яе далучыліся “больш за 120 прадстаўнікоў ініцыятыў і суполак з розных кантынентаў”.

“Канферэнцыя дасць беларусам афлайн-пляцоўку, дзе мы разам разгледзім праблемы, што актуальныя тут і зараз, вызначым шляхі іх вырашэння, абмяркуем тое, што хвалюе грамадзянскую супольнасць, — адзначыла Ціханоўская. — Не ў агульных чатах ці праз матэрыялы ў незалежных медыя, а асабіста, ужывую”.

Раней каманда офіса ладзіла такія канферэнцыі ў 2021 і 2023 годзе ў Вільнюсе.