СМІ: Беларусь і Швецыя адклікалі сваіх дыпламатаў у Мінск і Стакгольм
5 студзеня, Позірк. Кіраўнікі дыпламатычных ведамстваў Беларусі і Швецыі адкліканыя для кансультацый у свае сталіцы, паведамляе “Радыё Свабода” са спасылкай на Міністэрства замежных спраў гэтай скандынаўскай дзяржавы.
Паводле звестках ведамства, праца шведскай амбасады ў Мінску “працягваецца ў звычайным рэжыме”, а беларускі амбасадар з’ехаў са Стакгольма на радзіму для кансультацый.
З 5 верасня 2022 года кіраўніком шведскай дыпмісіі ў Беларусі з’яўляецца Ева Сундквіст, якая выконвае абавязкі часовага паверанага ў справах Швецыі.
Паслом Беларусі ў Швецыі Аляксандр Лукашэнка прызначыў Дзмітрыя Мірончыка 22 мая 2018 года.
Былы пасол скандынаўскай дзяржавы Крысціна Юханесан (узначальвала пасольства ў 2017–2022 гадах) з 6 лістапада 2023 года з’яўляецца спецыяльным пасланнікам Швецыі па сувязях з беларускімі дэмакратычнымі сіламі.
У гэты дзень кіраўнік МЗС Тубіяс Білстрэм заявіў, што афіцыйны Стакгольм прызнае дэмакратычнага лідара Святлану Ціханоўскую “чалавекам, які перамог на выбарах [2020 года] і які па праве павінен быў стаць інаўгуруючым прэзідэнтам Беларусі”.
Менавіта гэтыя заявы, паводле інфармацыі “РС”, сталі падставай для адклікання беларускага амбасадара ў Мінск.
Швецыя, будучы часткай ЕС, выконвае санкцыі ў дачыненні да Беларусі.
У Міжнародны дзень салідарнасці з палітвязнямі Беларусі 21 мая 2023 года шведскі МЗС падтрымаў “усіх, каго рэжым Лукашэнкі пераследуе па палітычных матывах”.
Разам з тым 10 красавіка пасол Польшчы пры ЕС Анджэй Садась заявіў інфармагенцтву РАР, што праца над новымі санкцыямі ў дачыненні да Беларусі не прасоўваецца праз пытанне ўгнаенняў і “пасіўнасць” Швэцыі, якая старшынюе ў Еўрасаюзе. “Шведы практычна нічога з гэтым не робяць. <…> Мы былі вельмі расчараваныя адсутнасцю амбіцый у плане санкцый супраць Беларусі, гэтак неабходных у сувязі з пераследам апазіцыі ў гэтай краіне, удзелам у вайне на баку Расіі, а таксама планамі размяшчэння ядзернай зброі на яе тэрыторыі”, — сказаў дыпламат.
Швецыя адной з першых прызнала незалежнасць Беларусі. 14 студзеня 1992 года было падпісана пагадненне аб устанаўленні дыпламатычных адносін.
