Праваабаронцы: Беларускія сілавікі абшукваюць кватэры людзей, нібыта звязаных з Каардынацыйнай радай

28 лістапада, Позірк. У Мінску 28 лістапада адбываецца мінімум шэсць ператрусаў — сілавікі прыйшлі па месцах рэгістрацыі і да родных прадстаўнікоў дэмакратычных сілаў Беларусі, нібыта звязаных з Каардынацыйнай радай па ўрэгуляванні палітычнага крызісу (КР), паведамляе праваабарончы цэнтр “Вясна”.

У прыватнасці, з ператрусам прыйшлі ў кватэры да кіраўніка Народнага антыкрызіснага ўпраўлення (НАУ) Паўла Латушкі і супрацоўнікаў НАУ.

У сваім тэлеграм-канале Латушка заявіў, што гэта не паўплывае на дзейнасць Народнага антыкрызіснага ўпраўлення “па прыцягненні да адказнасці прадстаўнікоў рэжыму Лукашэнкі”.

Сілавікі прыходзілі таксама да кіраўніка руху “За свабоду” Юрася Губарэвіча, які напісаў у “Фэйсбуку”: “Дзіўныя людзі прыходзілі шукаць маю маёмасць па месцы прапіскі. Ведаючы бандыцкую сутнасць гэтага рэжыму, усё распрадаў яшчэ да канца 2021 года”.

Пра ператрус у кватэры аналітыка, эканаміста Сяргея Чалага паведамілі самі сілавікі ў тэлеграм-канале, дзе апублікавалі фатаграфію разгромленай кватэры і абразлівы допіс на адрас Чалага. Яны паведамілі, што ператрус у эканаміста адбыўся па “справе выбараў у Каардынацыйную раду”. Той жа канал піша пра ператрус у прэс-сакратара Святланы Ціханоўскай Ганны Красулінай.

Былы кіраўнік арганізацыі “Малады фронт” Артур Фінькевіч напісаў у “Фэйсбуку”, што ў кватэру, дзе ён зарэгістраваны, таксама прыходзілі. “На мяне ўзбуджана некалькі крымінальных спраў. Мяне ў Беларусі няма 3 гады, не жыў па месцы рэгістрацыі каля 9 гадоў, ні рэчаў, ні маёмасці ў Беларусі не маю”, — адзначыў Фінькевіч.

Як паведамляе “Вясна”, да людзей, якія нібыта звязаныя з КР, прыйшлі з пастановамі на ператрус паводле шасці артыкулаў Крымінальнага кодэкса:

• здрада дзяржаве (арт. 356);

• змова або іншыя дзеянні з мэтай захопу дзяржаўнай улады (арт. 357);

• заклікі да мер абмежавальнага характару (санкцый), іншых дзеянняў, накіраваных на прычыненне шкоды нацыянальнай бяспецы (арт. 361);

• стварэнне экстрэмісцкага фармавання альбо ўдзел у ім (арт. 361¹);

• фінансаванне экстрэмісцкай дзейнасці (арт. 361²);

• садзейнічанне экстрэмісцкай дзейнасці (арт. 361⁴).