Войска Латвіі: Уначы паблізу мяжы з Беларуссю зафіксаваныя тры паветраныя цэлі

11 лістапада, Позірк. Аб чатырох паветраных цэлях, выяўленых у ноч на 11 лістапада, паведамляе партал Sargs.lv са спасылкай на Нацыянальныя ўзброеныя сілы (НУС) краіны. Тры з іх перасеклі мяжу Латвіі.

Паводле інфармацыі вайскоўцаў, тры цэлі былі зафіксаваныя паблізу мяжы з Беларуссю. Дзве з іх праніклі ў паветраную прастору Латвіі і пасля пакінулі яе. Чацвёртай цэллю быў беспілотнік, які прыляцеў з Літвы. Ён перасёк тэрыторыю Латвіі і працягнуў рух у паветранай прасторы Эстоніі.

У сувязі з яго палётам паветраная трывога абвяшчалася ў Айзкраўкльскім, Екабпілскім, Мадонскім, Цэсіскім, Смілтэнскім і Гулбенскім краях.

Паведамляецца, што для рэагавання на паветраныя пагрозы былі задзейнічаныя падраздзяленні супрацьпаветранай абароны і беспілотнікі-перахопнікі НУС, а таксама знішчальнікі місіі НАТО па патруляванні паветранай прасторы краін Балтыі.

Аднак беспілотнік, які перасекў Латвію і накіраваўся ў Эстонію, збіць не ўдалося. Як растлумачылі НУС, знішчальнікі НАТО не змаглі заняць пазіцыю, прыдатную для знішчэння цэлі.

Вайскоўцы таксама адзначылі, што пры прыняцці рашэння аб знішчэнні беспілотніка неабходна ўлічваць рызыкі для цывільнага насельніцтва. Такія рызыкі існавалі і ў дадзеным выпадку.

Вайскоўцы адзначылі, што першыя папярэджанні аб паветранай пагрозе былі абвешчаныя 10 лістапада а 23:25 у Лудзенскім краі. Пасля трывога паслядоўна распаўсюджвалася на іншыя рэгіёны краіны. Апошнія папярэджанні былі адмененыя 11 лістапада ў 3:30.

Раней 11 лістапада “Позірк“ паведамляў, што ў сувязі з паветранай пагрозай у шэрагу рэгіёнаў Літвы і Латвіі абвяшчалася трывога, а праца аэрапортаў Вільнюса і Каўнаса часова прыпынялася.