На ўездзе ў Гродна ноччу аўтамабіль урэзаўся ў адбойнік і стэлу, загінула 22-гадовая дзяўчына

11 лістапада, Позірк. Аб гібелі 22-гадовай пасажыркі ў дарожна-транспартным здарэнні на ўездзе ў Гродна паведамляе ўпраўленне ДАІ УУС Гродзенскага аблвыканкама.

Паводле інфармацыі ведамства, аварыя здарылася 11 лістапада каля 2:30 на аўтадарозе М6 Мінск — Гродна.

30-гадовы кіроўца аўтамабіля “Аўдзі” рухаўся ў напрамку абласнога цэнтра. На ўездзе ў горад ён, як сцвярджаецца, няправільна абраў хуткасць руху, не даў рады кіраванню і ўрэзаўся ў дарожную агароджу. Пасля гэтага аўтамабіль сутыкнуўся з уязной стэлай.

22-гадовая дзяўчына, якая знаходзілася ў машыне, загінула на месцы.

Напярэдадні Белгідрамет папярэджваў аб ападках у выглядзе дажджу і мокрага снегу пры тэмпературы блізкай да нуля градусаў. Іх зона зрушылася з тэрыторыі Польшчы на заходнія раёны Беларусі. Мяркуючы па кадрах з месца ДТЗ, на дарозе ўтварылася снежная каша.

Дзяржаўтаінспекцыя заклікала кіроўцаў пазбягаць рэзкіх манеўраў і экстранага тармажэння ў зімовых дарожных умовах, а таксама выконваць асаблівую асцярожнасць пры праездзе скрыжаванняў, пешаходных пераходаў, эстакад і паваротаў.