Ганну Норкус, якая раней была фігуранткай гучнай крымінальнай справы, Лукашэнка узнагародзіў ордэнам Працоўнай славы

10 лістапада, Позірк. Ганна Норкус, кіраўнік Віцебскай бройлернай птушкафабрыкі, узнагароджаная ордэнам Працоўнай славы, вынікае з паведамлення прэс-службы Аляксандра Лукашэнкі. 

Раней яна была абвінавачанай у гучнай крымінальнай справе аб злоўжыванні службовымі паўнамоцтвамі, а яе будучы муж — грамадзянін Літвы Вальдэмарас Норкус — быў адным з фігурантаў гэтай справы.

Да замужжа Ганна Норкус насіла прозвішча Шарэйка. У 2014 годзе яе затрымалі, калі яна была генеральным дырэктарам птушкафабрыкі і членам Савета Рэспублікі. Дзеля гэтага верхняя палата Нацыянальнага сходу папярэдне пазбавіла яе дэпутацкай недатыкальнасці.

Паводле версіі следства, Шарэйка ўступіла ў змову з Норкусам, які ўзначальваў літоўскую фірму “Даймас” і быў звязаны з кампаніяй “Русском-Р”. 

Праз яе на птушкафабрыку пастаўляліся камбікорм і кармавыя дабаўкі. Следства лічыла, што пры выбары пастаўшчыка і заключэнні кантрактаў прадпрыемству быў нанесены ўрон. Сама Шарэйка віну не прызнала.

У чэрвені 2016 года Вярхоўны суд прыгаварыў яе да 2,5 года пазбаўлення волі са штрафам у 150 базавых велічынь (31,5 млн рублёў да дэнамінацыі 1 ліпеня 2016 года і 3.150 рублёў пасля яе).

Вальдэмарас Норкус атрымаў два гады зняволення з такім жа штрафам. Абодвух вызвалілі ў зале суда з улікам часу, праведзенага пад вартай, і амністыі.

Пасля вызвалення Шарэйка выйшла замуж за Норкуса. Таксама яна вярнулася на пасаду генеральнага дырэктара Віцебскай бройлернай птушкафабрыкі (гандлёвая марка “Ганна”).

У снежні 2020 года Лукашэнка прысвоіў ёй ганаровае званне заслужанага работніка сельскай гаспадаркі. У 2018 годзе Норкус таксама атрымала званне “Чалавек года Віцебшчыны”, а ў 2023-м — ганаровую грамату Савета міністраў.

Прадпрыемства развівае не толькі вытворчасць мяса птушкі, але і ўласную гандлёвую сетку, якая налічвае больш за 50 магазінаў, а таксама сетку аб’ектаў грамадскага харчавання.

29 снежня 2023 году Лукашэнка даручаў Норкус “перакінуць Пуціну” курыных яек. Тады ў Расіі быў іх недахоп.