Травеньскае забойства ў Гомелі: Ахвяра — замежнік, абвінавачанні выстаўленыя яго сужыцельцы, яе сыну інкрымінуецца ўкрывальніцтва
9 лістапада, Позірк. 31-гадовы мужчына з Гомеля, пра забойства якога стала вядома напрыканцы вясны, быў замежнікам, вынікае з паведамлення прэс-службы Следчага камітэта.
Паводле звестак ведамства, мужчына, грамадзянства якога не называецца, меў дазвол на часовае пражыванне на падставе працоўнай дзейнасці — ён працаваў аўтаслесарам на адной з гомельскіх станцый тэхнічнага абслугоўвання. Адзначаецца, што замежнік жыў разам з 53-гадовай жанчынай — уладальніцай трохпакаёвай кватэры, у якой таксама пражывалі яе дачка і два сыны (17, 13 і 18 гадоў адпаведна).
“Увечары 23 траўня яны разам ужывалі спіртное ў доме на лецішчы, размешчаным у тым жа раёне горада, — гаворыцца ў паведамленні. — Позна ўвечары сужыцелі вярнуліся ў кватэру, куды на запрашэнне жанчыны прыехала адна з дзвюх яе дарослых дачок з дзецьмі. Распіццё алкаголю працягнулася”.
“У нейкі момант мужчына пераключыў увагу на свой мабільны тэлефон і пачаў весці жывы эфір у “ЦікТоку”. Гаспадыня кватэры настойліва заклікала спыніць стрым, а пасля выхапіла з яго рук тэлефон і разбіла прыладу, кінуўшы на падлогу ў калідоры. Падчас канфлікту жанчына нанесла ўдар нажом у грудную клетку замежніка. Ад атрыманых цялесных пашкоджанняў ён памёр на месцы здарэння”, — заявіў СК.
Згодна з інфармацыяй ведамства, жанчына, жадаючы схаваць зробленае, “выправадзіла ўсіх сваякоў з кватэры”. Калі яе 18-гадовы сын вярнуўся, яна шантажом “прымусіла яго дапамагчы схаваць сляды злачынства”.
“Уначы яны загарнулі цела загінулага ў покрыва, вынеслі на вуліцу і на “Хёндэ”, які належыць абвінавачанай, перавезлі на дачу. На прысядзібным участку яны закапалі цела і вярнуліся дадому, — адзначана ў паведамленні. — Ранкам таго ж дня жанчына вырашыла, што месца пахавання могуць выявіць, і прымусіла сына вярнуцца з ёй на лецішча. Яны набылі бензін, выкапалі цела і спалілі ў металічнай бондзе. Парэшткі рассяродзілі на гародзе па лунках і замаскавалі саджанцамі”.
Замежніка пачалі шукаць, калі ён не выйшаў на працу, — дырэктар СТА звярнуўся ў міліцыю.
Следчыя разам з супрацоўнікамі крыміналістычнага аддзела абласнога ўпраўлення СК і спецыялістамі Дзяржкамітэта судовых экспертыз дэталёва агледзелі кватэру, дачную тэрыторыю і аўтамабіль.
“На прысядзібным участку выяўленыя шматлікія фрагменты костак са слядамі тэрмічнага ўздзеяння. Таксама вынятыя іншыя значныя для следства аб’екты, па якіх праведзены шэраг экспертных даследаванняў, — паведаміла ведамства. — Па крымінальнай справе выкананы значны аб’ём следчых дзеянняў, у тым ліку праведзеныя праверкі паказанняў на месцы здарэння. Згодна з высновамі следства, здзяйсненню злачынства абвінавачанай спрыялі назапашаная крыўда ад шматлікіх канфліктаў на глебе рэўнасці з яе боку, стан алкагольнага ап’янення і правакацыйная сітуацыя, якая тады ўзнікла”.
Жанчына абвінавачваецца паводле ч. 1 арт. 139 (наўмыснае супрацьпраўнае пазбаўленне жыцця іншага чалавека), яе 18-гадовы сын — паводле ч. 2 арт. 405 (укрывальніцтва асабліва цяжкага злачынства) Крымінальнага кодэкса.
У Гомелі жанчына забіла сужыцеля, спаліла труп і рассыпала прах па гародзе
28 траўня, Позірк. Да гібелі 31-гадовага мужчыны прывёў яго канфлікт з 53-гадовай сужыцелькай, паведаміла Міністэрства ўнутраных спраў. "У міліцыю звярнуўся жыхар Гомеля з заявай аб знікненні свайго работніка. Аператыўнікам крымінальнага вышуку Гомельшчыны спатрэбілася менш за суткі, каб раскрыць жорсткае забойства", …
