2 лістапада, Позірк. У палітызацыі дапамогі па лініі ААН абвінаваціў гэтую арганізацыю міністр замежных спраў Максім Рыжанкоў на Міжнародным форуме Шанхайскай арганізацыі супрацоўніцтва па ўстойлівым развіцці 2 лістапада ў Мінску.
“Назіраецца дыферэнцыраваная, заснаваная на краінавых перавагах донарская дапамога па лініі праектаў міжнароднай тэхнічнай дапамогі ААН у мэтах развіцця. Часта донары спрабуюць не прытрымлівацца нацыянальных інтарэсаў краін-рэцыпіентаў, усё больш паглыбляючыся ў палітычныя пытанні”, — цытуюць Рыжанкова дзяржСМІ.
Канкрэтных прыкладаў чыноўнік не прывёў.
Паводле сцвярджэння Рыжанкова, “аднабаковыя прымусовыя меры не спрыяюць адкрытасці каналаў узаемадзеяння”, і “часта такія тэндэнцыі адбываюцца не без падачы саміх органаў сістэмы ААН, нягледзячы на абавязак выконваць свае мандаты на бесстаронняй аснове”.
У адным шэрагу з санкцыямі і “дэстабілізацыяй эканомікі праз [іх]” спікер згадаў неназваныя войны і канфлікты, “развязаныя Захадам”.
“Гэтыя перашкоды яшчэ больш падрываюць і без таго далікатныя магчымасці краін, якія развіваюцца, б’юць па харчовай, энергетычнай і фінансавай бяспецы, разбураюць лагістычныя ланцужкі”, — сказаў Рыжанкоў.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Гэта самы маштабны канфлікт у Еўропе з часоў Другой сусветнай вайны.
