Фільм “Лісты“ Андрэя Куцілы, акрамя партнёрскай прэміі, атрымаў галоўную ўзнагароду ў сваёй катэгорыі на фестывалі DOK Leipzig

2 лістапада, Позірк. Аб прысуджэнні фільму “Лісты” беларускага рэжысёра Андрэя Куцілы галоўнай узнагароды (“Залатога голуба”) за лепшы поўнаметражны дакументальны фільм на 69-м Міжнародным фестывалі дакументальнага і анімацыйнага кіно ў Лейпцыгу (DOK Leipzig, Германія) паведамляецца на сайце мерапрыемства.

Узнагарода была ўручана 31 кастрычніка. Грашовая частка прэміі, якую нямецкая тэлерадыёкампанія Mitteldeutscher Rundfunk (MDR) штогод фінансуе з 2013 года, складае 10 тыс. еўра.

Як паведаміла тэлерадыёкампанія, паводле ацэнкі журы, Куціла “спалучае розныя формы кінаапавядання, ствараючы шматслойную дакументальную мову, якая дазваляе паказаць нябачнае і зрабіць чутнымі галасы людзей, вымушаных маўчаць”: “Праз асабістыя гісторыі і біяграфіі фільм раскрывае лёс цэлай нацыі”.

Паводле інфармацыі MDR, карціна ўяўляе сабой дакументальны партрэт Беларусі з пункту гледжання людзей, якія перажылі пераслед, зняволенне ці выгнанне пры рэжыме Аляксандра Лукашэнкі. Праз турэмныя лісты і малюнкі, архіўныя матэрыялы і інтэрв’ю аўтар паказвае наступствы палітычных рэпрэсій і дзяржаўнага гвалту.

Падкрэсліваецца, што ў цэнтры апавядання — людзі, “якія захоўваюць імкненне да свабоды насуперак пастаяннаму сачэнню і зняволенню і плацяць за гэта высокі асабісты кошт”: “Акрамя рэпрэсій у Беларусі, фільм закранае тэмы свабоды, расстання, кахання і чалавечых сувязяў”.

Узнагароду ўручыў праграмны дырэктар MDR Барыс Лохтхафен.

Раней “Позірк” паведамляў, што фільм “Лісты” 2026 года (міжнародная назва — Letters from the Silenced Country) на тым жа фестывалі стаў лаўрэатам MDR (у 1995 годзе заснавала нямецкая тэлерадыёкампанія Mitteldeutscher Rundfunkо, грамадскі вяшчальнік федэральных зямель Саксонія). Яна адносіцца не да асноўных конкурсных прыз фестывалю, а да партнёрскіх узнагарод, грашовая частка складае 3 тыс. еўра.

DOK Leipzig заснаваны ў 1955 годзе і з’яўляецца найстарэйшым у свеце фестывалем дакументальнага кіно. Арганізатар – горад Лейпцыг (непасрэдна правядзенне ўскладзена на некамерцыйную кампанію Leipziger Dok-Filmwochen).

У верасні стужка “Лісты” была ўдастоена прэміі The Impact Golden Globes Prize for Documentary (узнагарода “Залатога глобуса” за ўплыў у дакументальным кіно) у рамках 83-га Венецыянскага міжнароднага фестывалю.

Таксама фільм увайшоў у шорт-ліст прэміі Еўрапейскай кінаакадэміі ў катэгорыі “Лепшы еўрапейскі дакументальны фільм”. Фіналісты стануць вядомы 14 лістапада. Цырымонія ўручэння 39-й прэміі пройдзе 16 студзеня 2027 года ў Афінах.

Андрэй Куціла нарадзіўся ў 1983 годзе ў Баранавічах (Брэсцкая вобласць). У 2007 годзе атрымаў ступень па журналістыцы Беларускага дзяржаўнага ўніверсітэта. У 2009 годзе скончыў Беларускую дзяржаўную акадэмію мастацтваў. Зняў больш за 10 фільмаў, лаўрэат шэрагу міжнародных кінапрэмій. Заснавальнік Беларускай незалежнай кінаакадэміі.