Польшча ўнесла ў спіс “непажаданых” асобаў 2,3 тыс. беларусаў — СМІ

30 кастрычніка, Позірк. Агульная колькасць асобаў, унесеных у спіс замежнікаў, чыё знаходжанне на тэрыторыі Польшчы непажаданае, складае 40.971, паведамляе газета Rzeczpospolita са спасылкай на супрацоўніцу Упраўлення па справах замежнікаў Катажыну Сівак.

З 1 студзеня па 30 верасня 2026 года ў спіс унесена 19.738 чалавек. Прыкладна кожны трэці “непажаданы” іншаземец — грамадзянін Украіны. Усяго ў спісе 14,3 тыс. украінцаў, больш за 4 тыс. грузінаў, 3,5 тыс. расіян і 2,3 тыс. беларусаў.

Пятае месца ў рэестры займаюць сірыйцы — забарону на ўезд у Польшчу і Шэнгенскую зону маюць 1.477 грамадзян гэтай краіны.

“Самую шматлікую групу сярод грамадзян Сірыі цяпер складаюць запісы, якія тычацца асоб, у дачыненні да якіх была вынесена пастанова аб выездзе з тэрыторыі Рэспублікі Польшча — гэта асобы, якія не былі дапушчаныя на тэрыторыю Польшчы ў сувязі з сітуацыяй на мяжы з Беларуссю”, — паведамілі ва Упраўленні па справах замежнікаў, удакладніўшы, што гэта людзі, затрыманыя непасрэдна пасля перасячэння мяжы ў парушэнне закона, якая з’яўляецца знешняй мяжой Шэнгенскай зоны.

Астатнія сірыйцы ўнесеныя ў спіс на падставе абавязацельстваў ЕС і санкцый.

Праведзены “Позіркам” аналіз паведамленняў польскага памежнага ведамства паказаў, што за апошнія 43 тыдні па патрабаванні ўладаў Польшчу пакінула 8,13 тыс. чалавек, з якіх сама меней 905 грамадзян Беларусі (добраахвотна — не менш за 841, прымусова — мінімум 64).

У 2025 годзе памежная ахова выканала больш за 9,4 тыс. рашэнняў, якія прадпісваюць замежнікам пакінуць тэрыторыю краіны ў добраахвотным або прымусовым парадку, паведамляў раней партал onet.pl, які атрымаў адпаведныя даныя ў адказ на свой зварот у ведамства.

Грамадзян Беларусі тычылася амаль 1,3 тыс., або крыху менш за 14% усіх рашэнняў. Адзначалася, што з гэтай колькасці каля 130 беларусаў было выслана прымусова (прыкладна 10%).

На 1 ліпеня 2026 года легальны статус у Польшчы на аснове дазволаў на пражыванне мелі 134 тыс. грамадзян Беларусі, аднак іх агульная колькасць можа дасягаць 250 тыс.