Лукашэнка — Эрдагану: Супрацоўніцтва Мінска і Анкары ўмацуецца рэалізацыяй новых ініцыятыў

29 кастрычніка, Позірк. Мінск надае “важнае значэнне” стасункам з Анкарой, якія “традыцыйна грунтуюцца на дружбе паміж народамі і імкненні дзвюх краін да глабальнага міру і стабільнасці”. Пра гэта гаворыцца ў віншаванні Аляксандра Лукашэнкі, накіраваным прэзідэнту Турцыі Рэджэпу Таіпу Эрдагану з Днём Рэспублікі.

“Упэўнены, беларуска-турэцкае супрацоўніцтва будзе і надалей умацоўвацца праз рэалізацыю новых ініцыятыў на эканамічным, гуманітарным і іншых напрамках у інтарэсах абедзвюх краін і рэгіёна ў цэлым“, — прыводзіць тэкст паслання прэс-служба віншавальніка.

Лукашэнка выказаў перакананасць, што гэтаму будзе спрыяць працяг “асабістага дыялогу“.

Працавітасць, нацыянальнае адзінства і знешнепалітычную самастойнасць Лукашэнка, які знаходзіцца пад шчыльным кантролем Масквы, назваў “трывалым падмуркам росквіту” Турцыі.

У леташнім падобным віншаванні беларускі палітык выказваў упэўненасць у “далейшай пазітыўнай дынаміцы двухбаковых кантактаў”.

“Мінск і Анкара — надзейныя партнёры, якія маюць шматгранныя і плённыя сувязі ў розных сферах — ад гандлю і інвестыцый да культурнага і гуманітарнага абменаў”, — заявіў Лукашэнка, падкрэсліўшы зацікаўленасць у “паглыбленні і інтэнсіфікацыі адносін на карысць народаў” дзвюх краін.

26 лютага 2024-га Лукашэнка, віншуючы Эрдагана з 70-годдзем, выказаў надзею на “хуткую сустрэчу, якая, безумоўна, адкрые новую старонку ў стасунках Мінска і Анкары”.

4 ліпеня таго ж года палітыкі правялі перамовы на палях саміту Шанхайскай арганізацыі супрацоўніцтва ў Астане.

30 студзеня 2025-га Эрдаган павіншаваў Лукашэнку з падаўжэннем паўнамоцтваў з дапамогай працэдуры, якую ўлады ў Мінску называюць прэзідэнцкімі выбарамі.

Кіраўнік турэцкай дзяржавы наведваў Мінск 11 лістапада 2016 года, праз чатыры месяцы пасля спробы ваеннага перавароту ў яго краіне.

Беларускія дзяржСМІ тады пісалі, што бакі “вялікую колькасць часу надалі асабістым стасункам, падчас якіх дэталёва ў даверным і адкрытым ключы абмяркоўваліся самыя розныя тэмы, пачынаючы ад парадку дня міждзяржаўнага супрацоўніцтва да сусветных і рэгіянальных праблем“.

Лукашэнка назваў Турцыю “прыярытэтным партнёрам“ і заявіў аб нацэленасці Менска на “прадуктыўнае ўзаемадзеянне ва ўсіх кірунках”.

Турцыя — член Паўночнаатлантычнага альянсу (НАТО). Арганізацыя Дамовы аб калектыўнай бяспецы (АДКБ), у якую ўваходзіць Беларусь, дэ-факта лічыць НАТО праціўнікам.