Статкевіч назваў аўтараў ліста былых палітвязняў прыхільнікамі ідэалогіі “асабістага выжывання і прыстасавання любым коштам”

28 кастрычніка, Позірк. З крытыкай групы былых палітвязняў, якія звярнуліся да краін Еўропы з адкрытым лістом і заклікам прыняць больш актыўны ўдзел у вызваленні вязняў у Беларусі, выступіў у сваім тэлеграм-канале 28 кастрычніка палітык Мікалай Статкевіч.

Паводле его слоў, у лісце гучыць заклік да гандлю палітвязнямі.

“Тэма амаль бяспройгрышная, бо хто ж супраць вызвалення невінаватых? Такія заклікі будуць станоўча ўспрынятыя не толькі самімі палітвязнямі і іх блізкімі, што цалкам зразумела. Яны будуць станоўча ўспрынятыя і рэжымам, які трымае палітвязняў у зняволенні і пастаянна папаўняе іх шэрагі, што робіць удзел у звароце, як мінімум, бяспечным”, — напісаў Статкевіч.

Былы палітвязень адзначыў, што для рэжыму Аляксандра Лукашэнкі такі заклік азначае — “чым больш пакупнікоў, тым большая выгада прадаўцу, а з папаўненнем запасаў “тавару” праблем няма”.

Статкевіч, які знаходзіцца ў Беларусі, называе аўтараў і падпісантаў ліста “прыхільнікамі ажыўлення рынку палітзняволеных”. Яны, паводле меркавання палітыка, акрамя медыйнага эфекту, спрабуюць звярнуць на сябе ўвагу кіраўніцтва краін, дзе атрымалі прытулак, што “для ўцекачоў таксама нямала”.

Звяртае Статкевіч увагу і на абгрунтаванні заклікаў, якія гучаць у лісце. Паводле слоў палітыка, напісаўшы ў звароце “няма нічога больш каштоўнага за чалавечае жыццё”, аўтары замянілі адно слова: “замест “чалавечае” больш сумленна было б напісаць “маё”.

“Такая падмена невідавочная ў вольных развітых краінах, дзе можна пражыць жыццё і ні разу не сутыкнуцца з сітуацыяй, калі прыходзіцца выбіраць паміж сваім жыццём і жыццём іншых людзей. У гісторыі ўсіх ацалелых народаў такі выбар паўставаў шматкроць, а ў многіх іншых краінах свету ён можа паўстаць і зараз”, — падкрэсліў Статкевіч.

Ён адзначыў, што аўтары звароту “ігнаруюць важнасць ідэалогій — гэта значыць ідэалаў, каштоўнасцяў або перакананняў, — яны насамрэч прапагандуюць самую старую і масавую ідэалогію — ідэалогію выжывання і прыстасавання любым коштам”. 

“Адэпты такой ідэалогіі складаюць апору любога рэпрэсіўнага рэжыму, бо дзеля ўласнага дабрабыту і самазахавання яны гатовыя на парушэнне любых нормаў чалавечай маралі. Ці проста на пакорлівае ігнараванне такіх парушэнняў”, — падкрэсліў палітык.

Былы палітвязень таксама звярнуў увагу на фразу з ліста “ніякая палітычная мэта не вартая здароўя і жыцця людзей”. Пры гэтым аўтары, паводле слоў Статкевіча, “маюць на ўвазе палітычныя мэты свабоды людзей і незалежнасці краін”.

“Я ўпэўнены, што менавіта распаўсюд гэтай тэзы з’яўляецца адной  з галоўных задач сапраўдных аўтараў звароту, што не здымае адказнасці з астатніх, якія далучыліся з-за “гуманных мэтаў” і “паважанай” кампаніі”, — адзначыў ён.

Мэта “сапраўдных аўтараў звароту”, як лічыць палітык, — “абясцэніць пакуты і ахвяры змагароў за свабоду Беларусі, свабоду і незалежнасць Украіны, свабоду ўсіх паняволеных краін свету ва ўсе часы, дыскрэдытаваць гэтыя каштоўнасці, зменшыць колькасць іх прыхільнікаў”. Што, як падкрэслівае Статкевіч, абражае яго асабіста, а таксама “вялікую колькасць вельмі годных людзей”, “як жывых, так і мёртвых”.

“Свядомыя ці несвядомыя выканаўцы гэтай спецаперацыі нават не пераймаюцца тым, што жывуць на ўтрыманні і пад абаронай народаў вольных ды заможных краін, якія сталі такімі дзякуючы барацьбе за свабоду сваіх нацыянальных герояў. Дыскрэдытуючы ўсе “палітычныя мэты” агулам, вы не абмінаеце і тыя ідэалы ды каштоўнасці, якія далі краінам, што вас прынялі, матывы зрабіць гэта. Бо вас палічылі паслядоўнікамі ўласных шанаваных герояў”, — напісаў палітык.

Паводле словаў Статкевіча, яшчэ “можна неяк патлумачыць”, чаму аўтары і падпісанты звароту разлічваюць “беспакарана гадзіць на магілы змагароў за свабоду сваёй краіны, на магілы загінулых за незалежнасць Украіны”. “Але калі вы робіце тое ж у адносінах да змагароў за свабоду краін, што далі вам прытулак, то няўжо вам не сорамна ці, дакладней, не страшна? А мо менавіта ваша ідэалогія і падштурхоўвае вас да гэтага?” — рэзюмаваў палітык.

У звароце, пра які стала вядома 26 кастрычніка, аўтары і тыя, хто далучыўся пазней, просяць еўрапейскіх палітыкаў выкарыстоўваць для вызвалення палітвязняў “усе даступныя сродкі: дыпламатычныя каналы, перагаворныя фарматы, ціск і стымулы, публічную і закрытую работу”.

Утрымліваецца заклік зрабіць вызваленне людзей і спыненне рэпрэсій “пастаянным пунктам парадку дня ў любым кантакце з Мінскам і ў любых размовах аб будучыні адносін з Беларуссю”, “прыярытэтам еўрапейскай палітыкі”.

Сярод тых, кто падпісаў ліст (усяго на раніцу 28 кастрычніка больш за 120 чалавек), муж Ціханоўскай Сяргей Ціханоўскі, прэтэндэнт на пасаду прэзідэнта на выбарах-2020 Віктар Бабарыка, член каманд Бабарыкі (да яго арышту) і Ціханоўскай Марыя Калеснікава, былыя кіраўнікі разгромленага ўладамі папулярнага партала tut.by Людміла Чэкіна і Марына Золатава, медыяменеджар Андрэй Аляксандраў, праваабаронцы Наста Лойка, Марфа Рабкова.

Заява выклікала публічныя спрэчкі паміж былымі палітвязнямі. Сярод падпісантаў, у прыватнасці, няма лаўрэата Нобелеўскай прэміі міру Алеся Бяляцкага, старшыні партыі Беларуская хрысціянская дэмакратыя Паўла Севярынца, актывістаў Мікалая Дзядка, Эдуарда Пальчыса і інш.