У Мінску сілавікі з шасці краін трэніраваліся абясшкоджваць “тэрарыстаў пад выглядам заўзятараў” і “ўзброеныя фармаванні”, якія прарываюць мяжу

9 кастрычніка, Позірк. Пра правядзенне сілавымі ведамствамі Беларусі, Ірана, Казахстана, Кітая, Расіі і Узбекістана ў Мінску і сталічным раёне “сумесных антытэрарыстычных вучэнняў “Еўразія-Антытэрор — 2026” паведамілі 8 кастрычніка Мінабароны і МУС Беларусі.

Паводле даных ваеннага ведамства, удзельнікі “адпрацавалі спыненне тэрарыстычных атак на аб’екты з масавым знаходжаннем людзей і крытычна важныя аб’екты з выкарыстаннем беспілотных сістэм, а таксама ліквідацыю незаконнага ўзброенага фармавання ў населеным пункце”.

Паводле інфармацыі Міністэрства ўнутраных спраў, у “Чыжоўка-Арэне” (Мінск, размешчана ў аднайменным мікрараёне Заводскага раёна) паводле сцэнарыя вучэнняў падчас фіналу хакейнага турніру “тэрарысты пад выглядам заўзятараў праніклі ў спарткомплекс з аўтаматычнай зброяй і гранатамі, пасля чаго падзяліліся на тры групы і адкрылі агонь: “Байцы спецпадраздзялення МУС “Алмаз” нейтралізавалі нападнікаў у прэс-цэнтры і на арэне і эвакуявалі закладнікаў”.

Затым спецпадраздзяленні адпрацавалі штурм аўтобуса, падагнанага “тэрарыстам” на іх патрабаванне: “Аперацыя суправаджалася выбухамі, каб адцягнуць увагу, і манеўраваннем бронеаўтамабіля і машыны МНС. Закладнікі не пацярпелі”.

Яшчэ адна ўводная прадугледжвала пранікненне праз дзяржмяжу “невялікіх груп незаконнага ўзброенага фармавання на плавальных сродках”. З дапамогай БПЛА і безэкіпажных катараў яны “мелі намер атакаваць крытычна важныя аб’екты”. У аперацыі ўдзельнічалі мабільныя агнявыя групы супрацоўнікаў КДБ і САХРа ўнутраных войскаў МУС Беларусі, а таксама байцы Цэнтра спецыяльнага прызначэння ФСБ Расіі.

Мяркуючы па фота прэс-службы ведамства, гэты эпізод, верагодна, быў разыграны на Чыжоўскім вадасховішчы.

На палігоне “Валоўшчына” (вучэбны цэнтр унутраных войскаў) удзельнікі адпрацавалі знішчэнне ўмоўнага незаконнага ўзброенага фармавання, якое захапіла памежны населены пункт, і “процідзеянне прасоўванню яго перадавых сіл углыб тэрыторыі краіны”.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны. Напад пачаўся, у тым ліку, з беларускай тэрыторыі. На гэтым фоне вучэнні сілавікоў праходзяць практычна безупынна.