Грамадзянка Беларусі цяжка параненая ў выніку атакі БПЛА на грузавік у Бранскай вобласці — МЗС
9 кастрычніка, Позірк. Грамадзянка Беларусі паранена ў выніку атакі БПЛА на грузавы аўтамабіль 8 кастрычніка ў Бранскай вобласці Расіі, гаворыцца ў паведамленні прэс-сакратара МЗС Беларусі Руслана Варанкова, размешчаным у афіцыйным тэлеграм-канале ведамства.
Аўто мела беларускую рэгістрацыю. “У сувязі з атрыманымі цяжкімі раненнямі” беларусцы спатрэбілася хірургічнае ўмяшанне, “якое ўключае ампутацыю канечнасцяў”: “Пацярпелая знаходзіцца ў аддзяленні рэанімацыі ў вельмі цяжкім, але стабілізаваным стане. Жанчына падключаная да апарата штучнай вентыляцыі лёгкіх”.
Амбасада Беларусі ў Расіі і яе аддзяленне ў Смаленску “надаюць неабходнае садзейнічанне, а таксама знаходзяцца ў кантакце з мясцовымі ўладамі і медыцынскай установай”.
“Міністэрства замежных спраў Беларусі раней папярэджвала аб павышанай небяспецы і рэкамендавала грамадзянам устрымлівацца ад паездак у гэтую мясцовасць. Аднак гэтыя папярэджанні не мелі належнага дзеяння. Сённяшняе здарэнне пацвярджае актуальнасць рэкамендацыі”*, — падкрэсліў прэс-сакратар.
Варанкоў таксама заявіў, што Мінск бачыць у тым, што адбылося, “спробу эскалацыі сітуацыі ў рэгіёне, а таксама складовую частку скаардынаваных дзеянняў, накіраваных на ўцягванне Беларусі ў канфлікт”.
17 чэрвеня аўтобус з выхаванцамі рэчыцкай дзіцяча-юнацкай спартыўнай школы № 2 (Гомельская вобласць) трапіў пад удар БПЛА ў Бранскай вобласці РФ. У транспартным сродку, які ехаў з Рэчыцы ў Геленджык, знаходзіліся 44 пасажыры, з іх 28 дзяцей-спартсменаў 2014–2015 гадоў нараджэння.
Пацярпела восем чалавек, у тым ліку шасцёра дзяцей, у выніку здарэння загінула жонка трэнера з Рэчыцкай ДЮСШ-2 Вікторыя Гарошка.
Аляксандр Лукашэнка заявіў, што ў аўтобус з беларускімі дзецьмі трапіў менавіта ўкраінскі дрон.
Прэзідэнт Украіны Уладзімір Зяленскі, каментуючы 19 чэрвеня гэтую сітуацыю, адзначыў: “Усе ўжо прызналі, і міжнародныя эксперты, і мне здаецца, што таксама і рускія прызнаюць або, скажам так, не адкрыта, што гэты ўдар быў не наш. Як гэта звязваць? Вельмі проста: рускія будуць рабіць шмат розных правакацый для таго, каб уцягнуць народ Беларусі ў гэтую вайну”.
У канцы верасня неафіцыйна паведамлялася пра тое, што два беларускія вялікагрузныя аўтамабілі трапілі пад удары беспілотнікаў недалёка ад пункта пропуску Чырвоны Камень, які знаходзіцца на беларуска-расійскай мяжы, на сумежным баку ў Гомельскай вобласці мае назву Селішча.
Раней паведамлялася пра ўдар беспілотніка ў пункце пропуску Чырвоны Камень на мяжы Гомельскай і Бранскай абласцей. Адзначалася, што ўдар быў нанесены 2 ліпеня ў 11:55. Пацярпеў аўтобус, які ехаў па маршруце Мінск — Анапа, у ім знаходзілася 19 пасажыраў. Два кіроўцы і адзін пасажыр атрымалі лёгкія раненні.
Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.
* Не ездзіць “у зоны канфліктаў, баявых дзеянняў і сумежныя з імі рэгіёны” рэкамендаваў МЗС Беларусі 17 чэрвеня гэтага года ў сувязі з атакай на аўтобус. Устрымацца ад паездак у Расію, “асабліва ў памежныя вобласці”, заклікаў суграмадзян 2 ліпеня дзяржсакратар Савета бяспекі Аляксандр Вальфовіч.
