КР стварыла камісію па расследаванні злачынстваў рэжыму Лукашэнкі

25 верасня, Позірк. Рашэнне стварыць камісію па расследаванні злачынстваў, учыненых прадстаўнікамі рэжыму Аляксандра Лукашэнкі, прынята 25 верасня на пасяджэнні Каардынацыйнай рады (КР), паведамляе яе прэс-служба.

Ініцыятарамі стварэння камісіі выступілі кааліцыі “Каманда Латушкі і рух “За Свабоду”, “Хопіць баяцца!”, “Беларусы дзеяння”, “Воля”.

Камісія будзе займацца зборам, фіксацыяй і захаваннем доказаў, дакументаваннем фактаў злачынстваў і іх абставінаў, а таксама “падрыхтоўкай матэрыялаў і рэкамендацый для будучых механізмаў пераходнага правасуддзя”.

У склад камісіі ўвайшлі прадстаўнікі розных фракцый КР. Кіраўніком стаў Аляксандр Ракіцкі, намеснікам кіраўніка — Міхаіл Кірылюк.

Заяўляецца, што камісія дзейнічае “на прынцыпах вяршэнства права, незалежнасці, бесстароннасці і аб’ектыўнасці”. “Яна не з’яўляецца судом і не вырашае пытанне аб крымінальнай вінаватасці — канчатковая ацэнка доказаў адносіцца да кампетэнцыі суда”, — гаворыцца ў паведамленні.

5 ліпеня 2025-га КР папярэдняга склікання падтрымала стварэнне спецыяльнага міжнароднага трыбунала аб адказнасці за ваенную агрэсію супраць Украіны.

У студзені 2025 года Каардынацыйная рада правяла спецыяльныя слуханні па пытанні адказнасці Аляксандра Лукашэнкі за злачынствы.

У беларускім дэмакратычным руху ўжо дзейнічаюць структуры, якія займаюцца дакументаваннем злачынстваў і парушэнняў правоў чалавека, а таксама пытаннямі будучага правасуддзя. У прыватнасці, працуе праект “Беларускі народны трыбунал”, які збірае сведчанні і доказы злачынстваў, учыненых прадстаўнікамі рэжыму Лукашэнкі. У лістападзе 2025-га праект прызнаны “экстрэмісцкім фарміраваннем”.

У чэрвені 2026 года юрыдычная каманда Офіса Святланы Ціханоўскай прадставіла канцэпцыю прыцягнення да адказнасці за рэпрэсіі ў Беларусі, якая прадугледжвае, у прыватнасці, захаванне доказаў і выкарыстанне нацыянальных і міжнародных механізмаў правасуддзя.