Працэдуру ўвозу тавараў у РФ з Беларусі паводле сістэмы СПЧТ плануецца спрасціць

21 верасня, Позірк. Мінск і Масква распрацоўваюць дакументы, якія, як чакаецца, спросцяць працэдуру ўвозу ў Расію з Беларусі паводле сістэмы пацвярджэння чакання пастаўкі тавараў (СПЧТ), заявіў па выніках даклада Аляксандру Лукашэнку 21 верасня старшыня Дзяржаўнага мытнага камітэта Уладзімір Арлоўскі.

“Больш за тры месяцы нашы партнёры выкарыстоўваюць гэтую сістэму, — нагадаў чыноўнік прадстаўнікам дзяржСМІ пра СПЧТ, якая запрацавала 1 чэрвеня. — Мы бачым, што пэўная нязручнасць для беларускіх экспарцёраў, вядома, маецца ў частцы кантролю на расійска-беларускай мяжы. Але нейкай сур’ёзнай праблемы мы не бачым. Так, пэўная колькасць машын, невялікая, літаральна паўпрацэнта, вяртаецца з улікам таго, што няма адпаведнага дакумента”.

Паводле сцвярджэння Арлоўскага, дакументы “саюзнага ўзроўню”, якія распрацоўваюцца разам з РФ, спросцяць працэдуру і палепшаць сітуацыю для беларускіх экспарцёраў.

Напрыканцы траўня ўрад Расіі адтэрмінаваў патрабаванне да сваіх імпарцёраў уносіць заклад перад пастаўкай тавараў з Беларусі. Прынятай тады пастановай імпарцёры былі вызваленыя ад унясення забеспячальных плацяжоў пры ўвозе ў РФ пэўных тавараў з краін Еўразійскага эканамічнага саюза (ЕАЭС) на працягу ўсяго чэрвеня.

Пры гэтым, калі пастаўшчык — арганізацыя або індывідуальны прадпрымальнік з Беларусі, а тавар увозіцца непасрэдна праз беларуска-расійскую мяжу, уносіць забеспячальны плацёж не трэба з 1 чэрвеня па 31 кастрычніка 2026-га.

17 красавіка 2026 года прэзідэнт РФ Уладзімір Пуцін падпісаў федэральны закон № 101-ФЗ, заяўленая мэта якога — прадухіліць ухіленне ад выплаты падаткаў (ПДВ і акцызаў) пры імпарце, а таксама забяспечыць законнасць абароту тавараў, што ўвозяцца з краін ЕАЭС.

Закон заклаў аснову СПЧТ. У адпаведнасці з гэтай сістэмай перад увозам тавару з ЕАЭС імпарцёр павінен падаць электронную заяўку на ажыццяўленне пастаўкі, унесці забеспячальны плацёж (заклад, які складае не менш за суму ўсіх падаткаў, што давядзецца выплаціць за гэты тавар) і перадаць перавозчыку атрыманы штрых-код, які пацвярджае паспяховае здзяйсненне дзвюх папярэдніх аперацый. Толькі ў такім выпадку тавар можа быць легальна ўвезены ў краіну.

Пасля імпарцёр, у якога замарожаная (па сутнасці вынятая з абароту) частка сродкаў — не менш за суму патэнцыйных падаткаў за тавар, павінен будзе выплаціць непасрэдна самі падаткі за пастаўленую прадукцыю. Толькі пасля гэтага ён можа прэтэндаваць на вяртанне закладу.

Дзеянне закона распаўсюджваецца на тавары, што ўвозяцца з 1 чэрвеня 2026 года. Прынятая напярэдадні гэтай даты пастанова ўрада РФ адсунула тэрмін увядзення гэтых патрабаванняў, часова зрабіўшы імпарт з Беларусі больш выгадным, чым з іншых краін ЕАЭС.

Нягледзячы на гэта, Лукашэнка і Пуцін у тэлефоннай размове 2 чэрвеня казалі пра “гандлёва-эканамічныя стасункі ў сувязі з увядзеннем расійскім бокам новай сістэмы СПЧТ”.