У Салігорскім раёне мужчына загінуў ад выбуху снарада, які ён спрабаваў распілаваць

18 верасня, Позірк. Аб гібелі ў Салігорскім раёне (Мінская вобласць) мясцовага жыхара, які спрабаваў распілаваць снарад, паведамляе УУС аблвыканкама.

Паводле папярэдняй інфармацыі, загінулы знайшоў старыя боепрыпасы, прынёс іх у свой гараж і паспрабаваў разабраць адзін са снарадаў, “каб дастаць з яго медзь”: “У працэсе распілоўвання снарад здэтанаваў”.

Ад атрыманых траўм мужчына памёр у бальніцы.

Падчас агляду гаража супрацоўнікамі міліцыі знойдзены і канфіскаваны “шэраг снарадаў”.

“Пры выяўленні любых боепрыпасаў, снарадаў, мін або знешне падобных на іх прадметаў катэгарычна забараняецца дакранацца да іх, перамяшчаць, разбіраць, здаваць у металалом або спрабаваць праводзіць любыя іншыя маніпуляцыі”, — нагадвае УУС.

За незаконныя дзеянні ў адносінах да агнястрэльнай зброі, боепрыпасаў і выбуховых рэчываў прадугледжана строгая крымінальная адказнасць, ад якой вызваляюцца асобы, якія добраахвотна здалі зброю, якая захоўваецца незаконна.

28 ліпеня паведамлялася аб гібелі жыхара Пінскага раёна (Брэсцкая вобласць), які “займаўся пошукам артэфактаў часоў Вялікай Айчыннай вайны, праяўляючы асаблівую цікавасць да выбухованебяспечных прадметаў”.

Цела мужчыны было знойдзена “з цялеснымі пашкоджаннямі, характэрнымі для мінна-выбухной траўмы”, адзначае ведамства.

У красавіку ад выбуху мінамётнай міны ў Брэсцкай вобласці загінуў падлетак.