З-за паху гару не менш чым на паўгадзіны быў перапынены рух цягнікоў на трэцяй лініі Мінскага метрапалітэна

28 жніўня, Позірк. Не менш чым на паўгадзіны быў перапынены ўвечары 28 жніўня рух цягнікоў на трэцяй (Зеленалужскай) лініі Мінскага метрапалітэна.

У 22.16 перавозчык паведаміў аб спыненні руху “ў сувязі з пахам гару ў тэхнічным памяшканні на адной са станцый” і прыбыцці супрацоўнікаў МНС.

У 22.44 было абвешчана аб аднаўленні руху на ўчастку ад “Юбілейнай плошчы“ да “Немаршанскага саду“, цягнікі не прыбывалі на канцавую станцыю “Слуцкі Гасцінец“. Магчыма, менавіта там і адбылося надзвычайнае здарэнне.

У 23.02 метрапалітэн паведаміў аб аднаўленні работы станцыі “Слуцкі Гасцінец“, уведзенай у эксплуатацыю менш за два гады таму, 30 снежня 2024 года.