4 жніўня, Позірк. Пра затрыманне ў Віцебскім раёне 40-гадовай жанчыны і яе 15-гадовага сына паведамляе МУС.
Затрыманыя, як адзначаецца, распаўсюджвалі наркотыкі на тэрыторыі Віцебска і Оршы (Віцебская вобласць). У іх канфіскавана “каля 200 грамаў асабліва небяспечнага псіхатропнага рэчыва мефедрон”.
На наркашоп жыхарка Оршы і яе сын працавалі каля месяца, гаворыцца ў паведамленні.
Распачатая крымінальная справа, затрыманым пагражае да 15 гадоў пазбаўлення волі, адзначае ведамства.
Паводле даных Вярхоўнага суда, за першыя шэсць месяцаў 2026 года за звязаныя з наркотыкамі злачынствы асуджана 1.039 чалавек, з іх 666 — за “незаконны абарот без мэты збыту” (ч. 1 арт. 328 КК), 314 — за “незаконны абарот з мэтай збыту” (ч. 2–5 арт. 328 КК).
Як паведамляў “Позірк”, паводле даных Вярхоўнага суда, у 2025 годзе колькасць асуджаных па “наркатычных” артыкулах Крымінальнага кодэкса павялічылася на 7,9% у параўнанні з 2024 годам.
За здзяйсненне злачынстваў, звязаных з незаконным абаротам наркотыкаў, летась было асуджана 2.253 чалавекі — 8% усіх асуджаных (у 2024 годзе — 2.088; 6,6%).
З іх 2.077, або 92,2%, прызнаныя вінаватымі паводле арт. 328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.
