У асобных раёнах Мінскай вобласці вырасла колькасць рэцыдываў і асабліва цяжкіх злачынстваў — пракуратура
23 ліпеня, Позірк. У Мінскай вобласці — нягледзячы на зніжэнне агульнай колькасці злачынстваў на 7% — у першым паўгоддзі адзначаны “шэраг негатыўных аспектаў у развіцці крымінагеннай абстаноўкі, якія патрабуюць аператыўнага рэагавання”, заявіў абласны пракурор Юрый Шчацько 23 ліпеня на пасяджэнні калегіі тэрытарыяльнага нагляднага органа.
Паводле яго слоў, якія прыводзіць прэс-служба Генеральнай пракуратуры, у асобных раёнах вобласці “зафіксаваны рост рэцыдыўнай злачыннасці, злачынстваў, здзейсненых у стане алкагольнага ап’янення, групай асоб, цяжкіх і асабліва цяжкіх злачынстваў”.
Акрамя таго, адзначыў чыноўнік, у вобласці зафіксаваны рост кіберзлачынстваў — з 1.034 да 1.362 (+31,7%). Для супрацьдзеяння кіберзлачыннасці Шчацько прапанаваў “забяспечыць належнае ўзаемадзеянне з банкамі і аператарамі сотавай сувязі, а таксама ўзмацніць прафілактычную і тлумачальную працу з насельніцтвам”.
На пасяджэнні разгледжаныя пытанні гібелі грамадзян ад вонкавых прычын. Нягледзячы на зніжэнне колькасці загінулых ад пажараў (-6,3%), “негатыўная дынаміка захоўваецца ў дзесяці раёнах”.
“Адзначаны рост узроўню вытворчага траўматызму (+22,5%), колькасці здзейсненых непаўналетнімі суіцыдальных спробаў (+16,7%), а таксама несуіцыдальных самапашкоджанняў падлеткаў (у 1,9 раза)”, — сказаў пракурор.
Паводле яго слоў, праца суб’ектаў прафілактыкі ў сферы папярэджання суіцыдальных паводзінаў непаўналетніх “нярэдка носіць фармальны характар”.
На калегіі таксама разгледжаныя пытанні супрацьдзеяння карупцыі. У прыватнасці, звернутая ўвага на працу органаў унутраных спраў па выяўленні карупцыйных злачынстваў — у першым паўгоддзі 2026 года іх было выяўлена на 16,1% менш, чым за аналагічны перыяд 2025-га.
Агульная колькасць зарэгістраваных злачынстваў у 2025 годзе зменшылася ў параўнанні з 2024 годам на 12,7%, паведамляла Генпракуратура 13 лютага 2026-га.
Колькасць асабліва цяжкіх і цяжкіх злачынстваў знізілася на 3,4%, менш цяжкіх — на 13,7%, тых, што не нясуць вялікай грамадскай небяспекі, — на 17,2%, карупцыйных злачынстваў — на 18,2%.
Згодна з данымі Вярхоўнага суда, па выніках судовых разбіральніцтваў у 2025 годзе асуджана 28.177 чалавек (годам раней — 31.410, у 2023-м — 33.777, у 2022-м — 36.356). У 2025 годзе суды апраўдалі 36 чалавек (у 2024-м — 60, 2023-м — 47, 2022-м — 33, 2021-м — 51, 2020-м — 93). Доля апраўдальных прыгавораў у крымінальных працэсах зменшылася да 0,13% (0,19 у 2024-м).
