Экс-кіраўніца КР Анжаліка Мельнікава жыве ў Мінску, сцвярджаюць “Кіберпартызаны”
23 ліпеня, Позірк. Былая спікер Каардынацыйнай рады (КР) Анжаліка Мельнікава, якая знікла ў сакавіку 2025 года, жыве ў Мінску, сцвярджаецца ў публікацыі ініцыятывы “Кіберпартызаны”.
“Мы <…> атрымалі доказы таго, што ў цяперашні момант Мельнікава знаходзіцца ў Мінску разам з дзвюма дочкамі і пражывае ў кватэры па адрасе вуліца Пятра Мсціслаўца, дом 24, — заяўляе арганізацыя (захаваны аўтарскі стыль). — Акрамя таго, пашпарт на імя Радзівонава Ангеліна Аляксееўна 1990-02-02 належыць ёй. Мельнікава перыядычна карыстаецца гэтым дакументам, каб хаваць сваю асобу”.
Наяўнасць пашпарта прыкрыцця “дазваляе зрабіць выснову, што незалежна ад матываў такога ўчынку яна пайшла на супрацу з КДБ”.
На гэты момант застаецца незразумелым, “з якіх прычын і калі менавіта Анжаліка Мельнікава пагадзілася на здзелку з КДБ, ці было гэтае рашэнне цалкам добраахвотным або прынятым пад прымусам”, адзначаецца ў публікацыі. “Тым не менш, паводле вынікаў расследавання мы дакладна высветлілі сапраўднае месцазнаходжанне Мельнікавай і факт супрацы з КДБ”, — падкрэсліла ініцыятыва.
Пра тое, што Мельнікава не знаходзіцца на тэрыторыі Польшчы і не выходзіць на сувязь з 25 сакавіка 2025 года, “Позірку” паведаміла 28 сакавіка прэс-служба намесніка кіраўніцы Аб’яднанага пераходнага кабінета, кіраўніка Народнага антыкрызіснага ўпраўлення Паўла Латушкі, у чыю фракцыю ў КР уваходзіла зніклая.
Пазней СМІ паведамілі, што Мельнікава магла вылецець з Польшчы ў Вялікабрытанію, куды на яе імя быў набыты авіяквіток.
7 красавіка стала вядома, што паліцыя Вялікабрытаніі не праводзіць расследавання ў сувязі з яе знікненнем. У той жа дзень партал навін “Люстэрка” заявіў пра размову з былым мужам Мельнікавай, які пацвердзіў, што іх дзеці — дзяўчынкі 7 і 13 гадоў — знаходзяцца з ім у Беларусі.
Пра тое, што Мельнікава вывела на свой банкаўскі рахунак сродкі фонду Bialorus Liberty, заявіла звязаная з ім ініцыятыва “Кіберпартызаны” 12 траўня 2025 года.
Паводле даных ініцыятывы, першы выпадак нямэтавага вываду сродкаў фонду быў зафіксаваны 22 студзеня 2025 года. Сцвярджаецца, што грошы выкарыстоўваліся для аплаты паслуг сэрвісу рэзервацыі жылля Booking, разлік ажыццяўляўся з банкаўскай карты, якая знаходзілася ў Мельнікавай.
На працягу лютага 2025 года Мельнікава “раз на некалькі дзён” пераводзіла на асабісты рахунак “не належныя ёй сродкі сумамі да 2,5 тыс. долараў”, у тым ліку “выкарыстоўвала сэрвіс экспрэс-пераводаў для паскарэння транзакцый”, падкрэсліваюць “Кіберпартызаны”.
Сцвярджаецца, што 13 сакавіка на рахунак Bialorus Liberty паступіў грант для Каардынацыйнай рады (каля 107 тыс. долараў), атрыманне гэтай сумы не ўзгаднялася з прадстаўнікамі “Кіберпартызан”.
На працягу сакавіка Мельнікава з дапамогай некалькіх транзакцый перавяла на асабісты рахунак усю суму гранту, а таксама “ўсе астатнія сродкі” фонду.
Апошняя аперацыя па вывадзе сродкаў датуецца 24 сакавіка 2025 года.
Журналісты выдання “Люстэрка” высветлілі, што ўжо пасля знікнення ад імя Мельнікавай было заключана некалькі здзелак з нерухомасцю ў Мінску. У верасні 2025 года на дакументы жанчыны была набытая кватэра на праспекце Любімава, а ў студзені 2026 года — яшчэ адна кватэра на вуліцы Пятра Мсціслаўца ў ЖК “Маяк Мінска” (мікрараён Усход).
