Аранжавы ўзровень небяспекі абвешчаны ў Мінскай, Брэсцкай і Гродзенскай абласцях

7 ліпеня, Позірк. У трох абласцях Беларусі на 8 ліпеня абвешчаны аранжавы ўзровень небяспекі праз непагадзь, паведамляе Міністэрства па надзвычайных сітуацыях.

Гаворка пра Мінскую, Брэсцкую і Гродзенскую вобласці.

У гэтых рэгіёнах чакаюцца навальніцы, дажджы, моцны вецер.

Ведамства папярэдзіла пра магчымыя наступствы: абрушэнне канструкцый, падтапленне дамоў, гаспадарчых пабудоў і ўчасткаў дарог, пашкоджанне ліній сувязі і электраперадачы, парушэнне электразабеспячэння.

Насельніцтву і арганізацыям дадзены рэкамендацыі для пазбягання негатыўных наступстваў.

Паводле даных Белгідрамета, 8 ліпеня максімальная тэмпература ў Беларусі складзе ад 16 градусаў на захадзе да 22 на паўднёвым усходзе. Чакаецца ўзмацненне паўднёва-заходняга, заходняга ветру парывамі 15–20 м/с, у асобных раёнах на захадзе — да 24 м/с.