Вада ў беларускіх рэках прагрэлася амаль да 30 градусаў
30 чэрвеня, Позірк. За перыяд з 26 па 29 чэрвеня тэмпература вады ў беларускіх рэках павысілася і складае ад 18 да 29 градусаў, паведамляе Белгідрамет.
У вадаёмах тэмпература вады дасягнула 22-27 градусаў.
На рэках назіраўся спад узроўню вады (да 9 см за суткі), у выніку чаго на Дняпры ў Лоева ён апусціўся ніжэй за небяспечна нізкую адзнаку, на Заходняй Дзвіне ў Віцебска — дасягнуў яе.
На Нёмане ў Гродне, Дняпры ля Магілёва, Жлобіна і Лоева, Бярэзіне ля Бабруйска, Сожы ля Крычава, Слаўгарада і Гомеля ўзровень вады знаходзіцца ніжэй за адзнакі, што лімітуюць суднаходства.
“У найбліжэйшыя дні на рэках будзе назірацца паніжэнне ўзроўняў вады, на Дняпры ля г. Рэчыца і Бярэзіне ля г. Светлагорск узроўні вады апусцяцца ніжэй адзнак, якія лімітуюць суднаходства”, — гаворыцца ў паведамленні Белгідрамета. Асобна для сітуацыі на Бярэзіне каля Светлагорска выдадзена штармавое гідралагічнае папярэджанне.
Зніжэнне ўзроўняў вады адбываецца на фоне анамальна гарачага надвор’я (у Пінску — 40,4 градуса 29 чэрвеня), якое назіраецца ў краіне апошнія дні і працягнецца да 2 ліпеня.
Паводле звестак ТРВОД, за мінулыя выходныя ў краіне патанула 15 чалавек.
