Лукашэнка анансаваў сустрэчу з Пуціным і доўгую камандзіроўку — невядома куды

23 чэрвеня, Позірк. Прымаючы кіраўніка беларускага ўрада Аляксандра Турчына з дакладам 23 чэрвеня ў Мінску Аляксандр Лукашэнка пацікавіўся ў яго вынікамі перагавораў з прэм’ер-міністрам Расіі Міхаілам Мішусціным у рамках нядаўняга візіту ў РФ.

“Чым скончылася гэтая размова? Гэта вельмі актуальна перад маёй сустрэчай з прэзідэнтам Расіі, на якой мы, як звычайна, у гэтым плане абмяркоўваем тое, што не вырашана ўрадамі, — цытуе спікера яго прэс-служба. — Ці маюцца такія пытанні? Як іх будзем вырашаць? І праблемныя пытанні (калі яны маюцца) у нашых стасунках”.

Нагадаўшы, што ў Мінску і Мінскай вобласці неўзабаве пройдзе XIII Форум рэгіёнаў Беларусі і Расіі (25–26 чэрвеня), Лукашэнка заявіў, што гэта “вельмі добрая пляцоўка для абмеркавання не толькі наяўных, але і стратэгічных пытанняў”.

“Таму трэба будзе вам гэтым займацца перш за ўсё, бо ў мяне тут працяглая камандзіроўка. І ў сувязі з гэтай працяглай камандзіроўкай — таксама якія пытанні нам трэба будзе вырашаць. Можа, маюцца прапановы”, — сказаў ён, не ўдакладніўшы, куды збіраецца.

Напярэдадні прэс-сакратар расійскага прэзідэнта Дзмітрый Пяскоў паведаміў журналістам, што Лукашэнка і Уладзімір Пуцін на будучай сустрэчы сярод іншага абмяркуюць “пагрозы Уладзіміра Зяленскага на адрас Мінска”.

“Сапраўды, і вы ведаеце, што і Аляксандр Рыгоравіч пра гэта казаў, у агляднай перспектыве плануюць ажыццявіць кантакты, гэта будзе добрая магчымасць для таго, каб абмеркаваць гэтыя і іншыя пытанні”, — заявіў ён.

19 чэрвеня украінскі прэзідэнт Уладзімір Зяленскі даў Лукашэнку тыдзень на зняцце з вышак рэтранслятараў для навядзення дронаў уздоўж мяжы з Украінай: “Калі ён гэта не зробіць, зробім мы”. Палітык таксама заклікаў Лукашэнку спыніць пастаўку нафтапрадуктаў расійскаму войску.

На наступны дзень у звароце да суайчыннікаў ён заявіў, што Украіне вядома “пра чатыры такія рэтранслятары ў Беларусі — у Гомельскай і Брэсцкай абласцях”, і паўтарыў, што Беларусь “мае час, каб дэмантаваць гэтае абсталяванне”.

Адначасова ён паведаміў, што Кіеву вядома “пра кожны завод у Беларусі, які працуе на Расію” і яе вайну. Прэзідэнт Украіны падкрэсліў, што “кожнае прадпрыемства, якое пастаўляе кампаненты для расійскай зброі — для бронетэхнікі, ракетных сістэм”, а таксама “прадпрыемствы, якія пастаўляюць Расіі паліва для вайны”, — усё гэта з’яўляецца “ўцягваннем Беларусі ў вайну”.

У інтэрв’ю тэлеканалу ТСН 21 чэрвеня Зяленскі зноў заявіў, што Лукашэнка на працягу бліжэйшага тыдня павінен прадэманстраваць канкрэтныя крокі па дээскалацыі.

Паводле слоў прэзідэнта, ён тлумачыў Лукашэнку, што трэба рабіць: “Дэманстрацыя канкрэтных крокаў. Крок № 1: ніякай тэхнічнай падтрымкі. Прамая падтрымка рэтранслятараў — выключыць, зняць і паказаць нам, што гэта знята. І мы завяршылі гэтае пытанне. Паколькі гэта перадавалася ім (беларускім уладам. — “Позірк“.) неаднаразова, мы перайшлі ў стадыю публічнага сігналу. Калі не здыме, то мы здымем — усё, што адбудзецца за тыдзень. Альбо яны, альбо мы. Вось і ўсё”.

“Таксама мы ім кажам, даем сігнал: спыніце, калі ласка, пастаўку паліва расійскай арміі. Але гэта толькі сігнал, тут няма ніякіх пагроз, нічога. Мы проста кажам, што гэта бачым”, — сказаў Зяленскі.