Беларуска не змагла ўвезці з Польшчы 11 рарытэтных прадметаў
22 чэрвеня, Позірк. Аб спыненні спробы “незаконнага перамяшчэння праз мяжу культурных каштоўнасцяў” паведаміў Дзяржаўны мытны камітэт (ДМК).
Адзначаецца, што рарытэты спрабавала ўвезці праз пункт пропуску Брузгі (з польскага боку — Кузніца) грамадзянка Беларусі — пасажыр легкавога аўтамабіля. Яна заявіла аб адсутнасці тавараў, якія падлягаюць дэклараванню.
Пры аглядзе багажу беларускі выяўленыя “карэтны і кішэнны гадзіннік, бронзавы бюст, футляры з металу з устаўкамі са шкла і іншыя прадметы ў колькасці 18 адзінак”, гаворыцца ў паведамленні.
“11 з іх, створаных больш за 50 і 100 гадоў таму, эксперт мытнай лабараторыі прызнаў культурнымі каштоўнасцямі. Гэтыя прадметы, агульным коштам каля трох тысяч еўра, канфіскаваныя да рашэння суда”, — падкрэслівае ДМК.
У дачыненні да жанчыны распачаты адміністрацыйны працэс паводле ч. 4 арт. 15.5 КаАП (недэклараванне альбо прадстаўленне недакладных звестак аб таварах).
