“Белавія” аднаўляе чартарныя рэйсы ў Катар

22 чэрвеня, Позірк. Нацыянальны перавозчык “Белавія” паведаміў аб аднаўленні з 10 жніўня прамых чартэрных рэйсаў у Катар.

Рэйс Мінск — Доха — Мінск будзе выконвацца адзін раз у 10–11 дзён.

Адзначаецца, што кансалідатарам рэйса з’яўляецца тураператар “Інтэрсіці”.

4 сакавіка 2023 года адбыўся першы чартар “Белавія” ў Доху, які таксама арганізоўваў тураператар “Інтэрсіці”. Праграма была разлічана да пачатку чэрвеня 2023 года, яе працягнулі да канца лета.

Увосень 2023 года планавалася аднаўленне рэйсаў з кастрычніка, з частатой прыкладна адзін рэйс у 10–11 дзён, але былі складанасці з дазволамі катарскага боку.

4 сакавіка 2024 года чартары аднавіліся.

У 2025 годзе рэгулярныя чартары з Беларусі ў Катар не лёталі.

23 чэрвеня 2025 года Іран нанёс ракетны ўдар па базе Аль-Удэйд у Катары — буйной авіябазе ЗША, размешчанай недалёка ад Дохі. Гэта адбылося ў рамках абвастрэння канфлікту паміж Ізраілем, ЗША і Іранам, калі Ізраіль і ЗША ўдарылі па іранскіх аб’ектах, а Іран адказаў ударам па згаданай базе. Аб ахвярах удару не паведамлялася, усе ракеты былі перахопленыя.

9 верасня Ізраіль нанёс паветраны ўдар па пазіцыях кіраўніцтва палестынскага руху ХАМАС, якое знаходзілася ў Досе для перамоваў аб спыненні агню ў вайне ў Газе. У выніку ўдару загінулі некалькі чалавек, уключаючы катарскага супрацоўніка службы бяспекі. Катар асудзіў гэта як парушэнне свайго суверэнітэту.

У сакавіку 2026 года падчас абвастрэння сітуацыі на Блізкім Усходзе эвакуацыйны рэйс у Доху спачатку быў перанесены з 1 на 2 сакавіка, пасля на 3-е, але адбыўся толькі 11 сакавіка.