У Магілёўскай вобласці загінуў 23-гадовы дарожны рабочы — яго збіла машына
22 чэрвеня, Позірк. Пра гібель 23-гадовага дарожнага рабочага паведамляе УУС Магілёўскага аблвыканкама.
Днём 22 чэрвеня 51-гадовы кіроўца, кіруючы аўтамабілем “Фіят”, рухаўся па аўтадарозе Р-122 Магілёў — Чэрыкаў — Касцюковічы, апісвае здарэнне УУС. Адзначаецца, што, рухаючыся ў крайняй правай паласе, кіроўца здзейсніў наезд на двух рабочых, якія “ішлі ў спадарожным кірунку да месца выканання дарожных работ на гэтым участку”.
У выніку ДТЗ малады мужчына загінуў, яго 41-гадовы калега з траўмамі дастаўлены ў бальніцу.
ДАІ рэкамендуе пешым удзельнікам дарожнага руху быць абачлівымі і пры адсутнасці тратуараў перамяшчацца па краі праезнай часткі насустрач руху транспарту.
У красавіку 2026 года намеснік міністра працы і сацыяльнай абароны Алег Такун паведаміў, што за апошнія 20 гадоў вытворчы траўматызм у Беларусі скараціўся ў тры разы, смяротны — у два. Паводле яго слоў, у 2025-м зафіксаваны гістарычны мінімум колькасці смяротных выпадкаў на працы — 103.
Паводле даных Мінпрацы, асноўны фактар траўматызму — недапрацоўка наймальніка (недастатковая падрыхтоўка рабочых месц, адсутнасць распрацаваных інструкцый, навучання ды інш.).
Колькасць дарожна-транспартных здарэнняў знізілася ў Беларусі за год на 5,5% (з 3.453 у 2024-м да 3.262 у 2025-м), вынікае з праведзенага “Позіркам” аналізу звестак Нацыянальнага статыстычнага камітэта. Колькасць загінулых у ДТЗ скарацілася на 1,8% (з 434 да 426), траўміраваных — на 8,4% (з 3.804 да 3.483).
