Ціханоўская: Улады ўсё часцей успрымаюць медработнікаў як рэсурс, які можна выкарыстоўваць без абмежаванняў

21 чэрвеня, Позірк. Беларускія медработнікі — гэта “людзі, якія штодня бяруць на сябе адказнасць за чалавечае жыццё і здароўе”, заявіла дэмакратычны лідар Святлана Ціханоўская 21 чэрвеня з нагоды з нагоды прафесійнага свята медыкаў.

“Іх праца патрабуе шмат самаадданасці: цэлыя гады ідуць на атрыманне ведаў і напрацоўку навыкаў, а кожны дзень на працы патрабуе цярпення, прафесіяналізму і мужнасці, — цытуе Ціханоўскую яе прэс-служба. — У дадатак да гэтага быць медыкам у Беларусі цяпер — гэта таксама працаваць ва ўмовах пастаяннага дэфіцыту кадраў, перагрузак і адміністрацыйнага ціску”.

Паводле слоў палітыка, адно з даследаванняў паказала, што 68% урачоў у Беларусі незадаволеныя ўмовамі працы.

“Кожны год у краіне скарачаецца колькасць бальніц, не хапае ўрачоў і неабходных лекаў, а многія спецыялісты вымушаныя пакідаць прафесію або з’язджаць за мяжу”, — падкрэсліла Ціханоўская.

Замест таго каб падтрымліваць медработнікаў, дадала яна, улады “ўсё часцей успрымаюць іх як рэсурс, які можна выкарыстоўваць без абмежаванняў”.

“Беларускія ўрачы рэгулярна працуюць значна больш устаноўленай нормы, сутыкаюцца з неаплатнымі перапрацоўкамі і бюракратычнай нагрузкай. Тым, хто хоча змяніць месца працы ці з’ехаць з краіны, ствараюць дадатковыя перашкоды. А на справядлівыя скаргі аб цяжкіх умовах працы яны чуюць у адказ: “Не трэба плакацца, што вы больш восем гадзін у суткі працуеце. Колькі трэба, столькі і працуем”, — адзначыла палітык.

На яе думку, да людзей, якія “аддаюць усіх сябе выратаванню чужых жыццяў”, нельга ставіцца “з такой абыякавасцю”.

“Быць урачом — значыць працаваць на карысць іншых, кожны дзень знаходзіць у сабе сілы на дапамогу людзям. Рэжыму гэтага не зразумець. Але беларусы гэта разумеюць. Ваша праца — велізарная каштоўнасць, а ваша служэнне людзям заслугоўвае павагі і падтрымкі. Дзякуй вам, дарагія медыкі”, — заявіла дэмлідар.

Аляксандр Лукашэнка, віншуючы медработнікаў 21 чэрвеня, адзначыў, што іх “імкненне дапамагаць людзям годнае павагі”.

“Ратуючы жыцці, захоўваючы і ўмацоўваючы здароўе грамадзян, вы ўносіце неацэнны ўклад у будучыню нашай краіны”, — адзначыў ён.

Паводле сцвярджэння віншавальніка, у Беларусі “створаныя шырокія магчымасці для развіцця медыцыны”: “Будуюцца бальніцы, набываецца сучаснае абсталяванне, паспяхова ўкараняюцца перадавыя тэхналогіі дыягностыкі і лячэння. Але ў аснове вашай дзейнасці заўсёды застаюцца высокі прафесіяналізм, адказнасць і міласэрнасць”.

Лукашэнка выказаў “шчырую падзяку работнікам і ветэранам галіны за самаадданую працу”.

“Упэўнены, — падкрэсліў ён, — людзі ў белых халатах працягнуць з апорай на слаўныя традыцыі айчыннай аховы здароўя аддана служыць справе і сваёй радзіме”.

Хоць улады рэгулярна заяўляюць, што ў краіне няма праблемы з медыцынскімі кадрамі, на сайце Дзяржаўнай службы занятасці на раніцу 21 чэрвеня мелася 2.296 вакансій урачоў-спецыялістаў і 1.850 вакансій медсясцёр.

Спыніць “ныць і плакаць” праз недахоп у Беларусі медработнікаў запатрабаваў Аляксандр Лукашэнка 3 красавіка ў Мінску на адкрыцці 42-й гарадской паліклінікі.

На яго думку, у Беларусі “людзей хапае”: “Трэба выбудаваць сістэму так, каб тыя людзі, якія маюцца, маглі працаваць і зарабляць, і абслугоўваць насельніцтва. Гэта больш як на 200 працэнтаў тычыцца Міністэрства аховы здароўя. Медыкі як прэзідэнт: колькі трэба, столькі і працуюць”.

У накіраваным у красавіку 2025 года ў ААН дакладзе кааліцыі няўрадавых арганізацый пра выкананне краінай абавязацельстваў па правах чалавека ў рамках чацвёртага цыкла Універсальнага перыядычнага агляду (УПА) гаварылася, што праз рэпрэсіўныя дзеянні ўладаў забеспячэнне медыцынскай дапамогай у Беларусі стала пагаршаецца.

Адзначалася, што ў Беларусі зафіксавана шмат выпадкаў прыпынення дзейнасці прыватных медыцынскіх цэнтраў.

Падтрымка ўладамі ваеннай агрэсіі Расіі супраць Украіны яшчэ больш пагоршыла недахоп жыццёва неабходных медыкаментаў і медыцынскага абсталявання, нягледзячы на ​​рост патрэбы ў іх.

Аўтары дакумента канстатавалі, што недахоп медыцынскага персаналу працягвае пагаршацца, чаму садзейнічаюць масавы ад’езд урачоў з краіны праз неспрыяльныя ўмовы працы, недастатковую аплату і палітычныя рэпрэсіі.

11 чэрвеня 2025 года начальніца галоўнага ўпраўлення кадравай працы і прафесійнай адукацыі Мінздароўя Вольга Калюпанава заявіла, што ў ахове здароўя Беларусі “існуе дастаткова добры кадравы рэсурс, самая вялікая задача — гэта рацыянальнае іх выкарыстанне”.

Пасля 2020 года з рэпрэсіямі ў Беларусі сутыкнуліся ў тым ліку медыкі. Многія з іх актыўна ўдзельнічалі ў пратэстах, выступаючы супраць гвалту і катаванняў над людзьмі. Кіраўніцтва бальніц звальняла нелаяльных медыкаў, хаця сярод іх былі прадстаўнікі ўнікальных для Беларусі спецыялізацый.

Гл. таксама:

Ціханоўская: Заробкі беларускіх медсясцёр сорамна назваць услых