Дарадца Ціханоўскай абмеркаваў у сталіцы Францыі “кантакты афіцыйнага Парыжа з беларускімі рэжымам”

11 чэрвеня, Позірк. Шэраг сустрэчаў з прадстаўнікамі Адміністрацыі прэзідэнта ў Елісейскім палацы, міністэрства Еўропы і замежных спраў, а таксама Нацыянальнага сходу Францыі правёў дарадца дэмлідара Святланы Ціханоўскай па дыпламатычных пытаннях Дзяніс Кучынскі падчас візіту ў Парыж.

Як паведамляе прэс-служба беларускага палітыка, адбыліся кантакты з дарадцам прэзідэнта Эманюэля Макрона па кантынентальнай Еўропе і Турцыі Бертранам Бухвальтэрам, дырэктарам Дэпартамента кантынентальнай Еўропы Міністэрства Еўропы і замежных спраў Брысам Ракфёем, дарадцам міністра Жана-Ноэля Баро па консульскіх пытаннях, кантынентальнай Еўропе і Балканах Патрыкам Рэнаром, кіраўніком групы “За дэмакратычную Беларусь” у Нацыянальным сходзе Фрэдэрыкам Пеці.

Бакі абмеркавалі “беларуска-французскія адносіны, актуальную сітуацыю ў Беларусі, рэгіянальны кантэкст і каардынацыю дзеянняў у сувязі з працяглай палітычнай і бяспекавым крызісам у рэгіёне”.

Гаворка ішла аб прыцягненні да адказнасці рэжыму Аляксандра Лукашэнкі за злачынствы супраць беларускага народа, рэпрэсіі, удзел у расійскай агрэсіі супраць Украіны і іншыя парушэнні міжнароднага права.

Абмяркоўваліся “актуальныя падыходы Францыі ў дачыненні да рэжыму Лукашэнкі, у тым ліку кантакты афіцыйнага Парыжа з беларускімі рэжымам”.

Кучынскі адзначыў “важнасць захавання прыхільнасці агульнаеўрапейскай палітыцы ў дачыненні да Беларусі” і падкрэсліў, што “любыя магчымыя змены ў адносінах з рэжымам павінны быць звязаныя з канкрэтнымі і вымяральнымі крокамі з яго боку”.

Закраналася санкцыйная палітыка Еўрасаюза. Дарадца Ціханоўскай заклікаў працягваць каардынацыю санкцыйнага ціску на Расію і рэжым Лукашэнкі, у тым ліку ў межах падрыхтоўкі наступных санкцыйных пакетаў, а таксама ўзмацняць выяўленне і спыненне абыходу ўжо дзейных абмежаванняў.

Французскі бок, як сцвярджаецца, “пацвердзіў падтрымку дэмакратычных памкненняў беларускага народа, а таксама гатоўнасць працягваць цеснае супрацоўніцтва з беларускімі дэмакратычнымі сіламі”.

2 кастрычніка 2025 года Ціханоўская сустрэлася ў Капенгагене з Макронам на палях саміту Еўрапейскай палітычнай супольнасці.

24 траўня 2026-га адбылася тэлефонная размова Макрона і Лукашэнкі. Агенцтва AFP са спасылкай на ананімную крыніцу, блізкую да прэзідэнта Францыі паведамляла, што той перасцярог Лукашэнку “ад удзелу ў вайне Масквы супраць Украіны”.

3 чэрвеня стала вядома пра візіт у Беларусь генеральнага дырэктара Галоўнага ўпраўлення знешняй бяспекі Францыі Нікаля Лернера. Афіцыйна аб ім не паведамлялася, але крыніца “Позірку” ў дыпламатычным асяроддзі пацвердзіла інфармацыю.