Пажар у Гродне — загінула гаспадыня кватэры, шпіталізаваная пенсіянерка, выратавана яшчэ шэсць чалавек, уключаючы дзяцей
10 чэрвеня, Позірк. Адзін чалавек загінуў на пажары за мінулыя дзяжурныя суткі (з 6:00 9 чэрвеня да 6:00 10 чэрвеня), сведчаць даныя аператыўнай зводкі Міністэрства па надзвычайных сітуацыях.
Смерць чалавека ад агню зафіксаваная ў Гродне. Загінула гаспадыня кватэры 1972 года нараджэння.
“Работнікамі МНС выратаваная грамадзянка 1960 г.н., якая знаходзілася ў гасцях, пенсіянерка, яна з атручваннем прадуктамі гарэння шпіталізаваная, з кватэр пад’езда выратаваныя шэсць чалавек (з іх двое дзяцей)”, — гаворыцца ў зводцы.
Напярэдадні вечарам МНС паведаміла, што сігнал аб пажары ў пяціпавярховым доме на вуліцы Пушкіна паступіў у ведамства ў 14:59. Адзначалася, што гарэла кватэра на першым паверсе.
“Пры правядзенні выведкі ў калідоры падпаленай кватэры ратавальнікі выявілі жанчыну, якая знаходзілася ў гасцях у гаспадыні, вынеслі яе на чыстае паветра і перадалі брыгадзе хуткай. Выратаваная шпіталізаваная. У пакоі, які гарэў, работнікі МНС выявілі гаспадыню кватэры без прыкмет жыцця”, — паведаміла МНС.
З вышэй размешчаных кватэр “пры дапамозе спецыяльных масак для абароны органаў дыхання” супрацоўнікі ведамства “выратавалі яшчэ шэсць чалавек, двое з якіх дзеці”.
Падкрэслівалася, што медыцынская дапамога ім не спатрэбілася.
Паводле даных МНС, з пачатку года ў Беларусі здарылася 3.625 пажараў (годам раней — 3.201, +13,2%), у тым ліку 13 — за мінулыя суткі. Загінула 309 чалавек (291, +6,2%), выратавана — 412 (326; 26,4%).
МНС рэгулярна карэктуе статыстыку па смерцях у бок змяншэння. Раней міністэрства тлумачыла перыядычнае прыніжэнне даных тым, што часам пасля правядзення судова-медыцынскай экспертызы высвятляецца — смерць наступіла не праз пажар. Наадварот, як заяўляла ведамства, узгаранне часам можа ўзнікнуць пасля смерці чалавека.
