Латвійскія памежнікі выявілі метэазонд з беларускімі кантрабанднымі цыгарэтамі

8 чэрвеня, Позірк. Аб выяўленні метэаралагічнага аэрастата з кантрабанднымі беларускімі цыгарэтамі паведаміла 8 чэрвеня Дзяржаўная памежная ахова пры МУС Латвіі.

Паведамляецца, што метэазонд быў знойдзены 6 чэрвеня ў воласці Вецсаліена Аўгшдаўгаўскага краю.

Да аэрастата быў прывязаны “прастакутны прадмет, абгорнуты чорнай поліэтыленавай плёнкай“, а пры аглядзе ўпакоўкі “было ўстаноўлена, што ў ёй знаходзяцца 20 тыс. цыгарэт маркі NZ Gold з беларускімі акцызнымі маркамі”.

Адзначаецца, што па факце кантрабанды ў буйным памеры ўзбуджаная крымінальная справа.

Раней 8 чэрвеня Літва і Польшча паведамілі пра затрыманне грамадзян, якія падазраюцца ў кантрабандзе беларускіх цыгарэт.