У Гомелі невядомыя заклікаюць грамадзян не кантактаваць са сваякамі тых, хто з’ехаў за мяжу — крыніца

Апублікавана на адкрытай версіі “Позірку” 18 траўня 2026 года ў 21:16

18 траўня, Позірк. Невядомыя маладыя людзі абыходзяць кватэры жыхароў Гомеля і раяць ім не падтрымліваць стасункі з суседзямі — сваякамі тых, хто з палітычных прычын быў вымушаны з’ехаць з Беларусі. Пра гэта паведаміла “Позірку” абазнаная крыніца (асоба не раскрываецца з меркаванняў бяспекі).

“А ці вы ведаеце такіх-та? Для вас будзе лепей з імі не размаўляць і не падтрымліваць стасункі. А яшчэ пазваніце, калі пабачыце побач з домам падазроныя машыны”, — пераказала сутнасць прапановы крыніца.

Маладыя людзі не прадстаўляюцца. Крыніца выказала здагадку, што яны з моладзевых атрадаў правапарадку, якія дзейнічаюць пры праўладным Беларускім рэспубліканскім саюзе моладзі.

Улады практыкуюць рэжым інфармацыйнай ізаляцыі (інкамунікада) для асуджаных паводле палітычных матываў.