Адмяняюцца авіярэйсы паміж Мінскам і маскоўскім аэрапортам Шарамецьева — на яго тэрыторыю ўпалі абломкі БПЛА

17 траўня, Позірк. Аб адмене авіярэйсаў паміж сталіцай Беларусі і маскоўскім аэрапортам Шарамецьева сведчаць даныя на анлайн-табло Нацыянальнага аэрапорта Мінск.

Гаворка пра палёты кампаній “Белавія” і “Аэрафлот” (РФ).

Адмененыя тры рэйсы з вылетам з Мінска (у 11:40, 14:40 і 14:45) і столькі ж — з вылетам з Масквы (10:40, 13:45, 18:20).

Пры гэтым адзін рэйс “Белавія” з вылетам з Масквы затрыманы — на табло пазначана, што прыбыццё ў Мінск чакаецца не ў 11:15, а ў 12:25.

17 траўня прэс-служба аэрапорта Шарамецьева паведаміла аб падзенні на яго тэрыторыю абломкаў беспілотнага лятальнага апарата.

“Абломкі знаходзяцца на бяспечнай адлегласці ад зон абслугоўвання пасажыраў і паветраных суднаў. На месцы працуюць аператыўныя службы, забяспечваюцца неабходныя меры бяспекі”, — гаворыцца ў паведамленні прэс-службы.

Пацярпелых і разбурэнняў няма, аэрапорт “працягвае абслугоўваць пасажыраў у штатным рэжыме”, паведамілі ў Шарамецьеве.

У ноч на 17 траўня ўкраінскія беспілотнікі атакавалі ў Маскве шэраг аб’ектаў.